దూరాలు

- April 12, 2016 , by Maagulf

నోట్లోనే ముడుచుకొని  పడుకున్న  నాలుక
మాట్లాడేందుకు మిగిలిందేదీ  లేనంత  నిశ్శబ్దం
నువ్వు  నాతో మాట్లాడవు
మునపటిలా నీలా    
పసలేని పాతంతా  ఇప్పుడొక  రోత 

కొన్ని రాళ్ళు
కొన్ని పువ్వులు
మీదకు విసిరేయబడినవి ఏవైతేనేం
జ్ఞాపకాలై  మిగిలినందుకు  అదృష్టమే
                                                  
వేసుకున్న  చెప్పులు
తొడుక్కున్న  బట్టలు
గర్వంగా గారాలు పోతున్న ఛాతి మీది బరువైన కీస      
నాకెప్పటికీ అర్థంకాని కొత్త  భాషను  నేర్పించాయి
నీకిప్పుడు                                   

దాచుకున్నవన్నీ  చేరోసగం  పంచుకో గలిగాం
పంచుకున్నవన్నీ పదిలంగా దాచుకోలేక పోయాం
ఎవరు ఎవరిని అర్థం చేసుకున్నారు
మన ప్రపంచమింకా ఒంటరిగానే వుంది
రాత్రిళ్ళు నిద్ర పట్టక
తెల్లార్లు మెలకువ రాక

కదిలే ఘడియల అడుగుల సవ్వడు లిప్పుడు
ఊపిరి పోసుకుంటున్న దూరాలు

--పారువెల్ల(దుబాయ్)

Click/tap here to subscribe to MAAGULF news alerts on Telegram
   
Copyrights 2015 | MaaGulf.com