రియాద్ః సౌదీ భద్రతా దళాలు ఒక వారం రోజుల్లో మొత్తం 8,943 మంది అక్రమ నివాసితులను అరెస్టు చేశాయి. మే 14 నుండి 20 మధ్య కాలంలో సంబంధిత ప్రభుత్వ సంస్థల సహకారంతో నిర్వహించిన సంయుక్త తనిఖీలలో  భాగంగా ఈ అరెస్టులు జరిగినట్లు అంతర్గత వ్యవహారాల మంత్రిత్వ శాఖ ప్రకటించింది. అరెస్టు అయిన వారిలో నివాస చట్టాన్ని ఉల్లంఘించిన వారు 4,638 మంది, సరిహద్దు భద్రతా చట్టాన్ని ఉల్లంఘించిన వారు 2,810 మంది మరియు కార్మిక చట్టాన్ని ఉల్లంఘించిన వారు 1,495 మంది ఉన్నారు.

సరిహద్దు దాటి సౌదీ రాజ్యంలోకి ప్రవేశించడానికి ప్రయత్నిస్తూ అరెస్టు అయిన వారి సంఖ్య మొత్తం 1,158గా ఉంది. వీరిలో 38 శాతం మంది యెమెన్ జాతీయులు, 61 శాతం మంది ఇథియోపియా జాతీయులు మరియు ఒక శాతం మంది ఇతర దేశాలకు చెందినవారు ఉన్నారు. రాజ్యాన్ని విడిచిపెట్టి అక్రమంగా వెళ్ళడానికి ప్రయత్నిస్తూ సుమారు 54 మంది అరెస్టు అయ్యారు.

మొత్తం 9,832 మంది అక్రమ నివాసితులను దేశం నుండి బహిష్కరించారు. అలాగే, ప్రయాణ పత్రాలను పొందడం కోసం 16,402 మంది ఉల్లంఘనదారులను వారి దౌత్య కార్యాలయాలకు పంపగా, 1,619 మందిని వారి ప్రయాణ రిజర్వేషన్లను పూర్తి చేసుకోవడానికి పంపారు. ఉల్లంఘనదారులకు రవాణా, ఆశ్రయం మరియు ఉపాధి కల్పించడంలో సహకరించిన ఎనిమిది మందిని కూడా అరెస్టు చేశారు.

సౌదీలోకి వ్యక్తులు అక్రమంగా ప్రవేశించడానికి ఎవరైనా సహకరించినా,  ఆశ్రయం లేదా మరే ఇతర సహాయం అందించినా... అటువంటి వారికి 15 సంవత్సరాల వరకు జైలు శిక్ష మరియు 1 మిలియన్ సౌదీ రియాల్స్ (SR) వరకు జరిమానా విధిస్తామని అంతర్గత వ్యవహారాల మంత్రిత్వ శాఖ హెచ్చరించింది. మక్కా, రియాద్ మరియు తూర్పు ప్రావిన్స్ ప్రాంతాలలో 911 నంబరుకు, అలాగే  మిగిలిన ప్రాంతాలలో 999 మరియు 996 నంబర్లకు కాల్ చేయడం ద్వారా ఏవైనా ఉల్లంఘనల కేసులను నివేదించాలని మంత్రిత్వ శాఖ ప్రజలను కోరింది.