హైదరాబాద్‌: మలయాళ సూపర్‌స్టార్‌ మోహన్‌లాల్‌, అల్లు శిరీష్‌ కీలక పాత్రల్లో నటించిన చిత్రం '1971: బియాండ్‌ బోర్డర్స్‌'. మేజర్‌ రవి దర్శకుడు. గతేడాది మలయాళంలో విడుదలైన ఈ చిత్రం మంచి టాక్‌ను తెచ్చుకుంది. తాజాగా ఈ సినిమాను 'యుద్ధభూమి: 1971 భారత సరిహద్దు' పేరుతో తెలుగులో విడుదల చేసేందుకు సన్నాహాలు చేస్తున్నారు. ఇటీవల చిత్ర బృందం 'యుద్ధభూమి' థియేట్రికల్‌ ట్రైలర్‌ను విడుదల చేసింది. 1971లో భారత్‌-పాకిస్థాన్‌ల మధ్య జరిగిన యుద్ధం నేపథ్యంలో ఈ సినిమా సాగుతుంది. ఇందులో మోహన్‌లాల్‌ కల్నల్‌ మహదేవన్‌ పాత్ర పోషించగా, అల్లు శిరీష్‌ లెఫ్టినెంట్‌ చిన్మయ్‌ పాత్రలో కనిపించనున్నారు. 'వార్‌ ఫీల్డ్‌లో లవ్‌ లెటర్స్‌కు రొమాన్స్‌కి నో టైమ్‌' అంటూ అల్లు శిరీష్‌కు మోహన్‌లాల్‌ సలహా ఇస్తూ కనిపించారు. సిద్ధార్థ్‌ విపిన్‌, నజీమ్‌ అర్షద్‌, రాహుల్‌ సుబ్రమణియన్‌లు సంగీతం అందించగా, గోపీ సుందర్‌ నేపథ్య సంగీతం అందించారు. జస్‌రాజ్‌ ప్రొడక్షన్స్‌ సమర్పణలో శ్రీ లక్ష్మీ జ్యోతి క్రియేషన్స్‌ పతాకంపై ఏఎన్‌ బాలాజీ నిర్మిస్తున్నారు. త్వరలోనే ప్రేక్షకుల ముందుకు రానుందీ చిత్రం.