ఫుజైరా:కోవిడ్ వ్యాప్తి నియంత్రణకు యూఏఈలోని పలు ఎమిరేట్స్ ఆంక్షలు కఠినతరం చేస్తున్నాయి. ఫెడరల్ ప్రభుత్వం మార్గనిర్దేశకాలకు అనుగుణంగా ఫుజైరా కూడా తమ ఎమిరేట్స్ పరిధిలో నిబంధనలను కఠినతరం చేసింది. ముఖ్యంగా పబ్లిక్ ప్రాంతాలు, పలు వ్యాపార కేంద్రాలు, మాల్స్ దగ్గర రద్దీని నియంత్రించేందుకు పరిమితులు విధించింది. ఫుజైరా ప్రకటించిన కొత్త నిబంధనల మేరకు ఇక నుంచి పబ్లిక్ బీచ్ లు, పార్క్ లలో పూర్తి స్థాయి సామర్ధ్యంలో 70 శాతానికి మించి విజిటర్లను అనుమతించరు. షాపింగ్ మాల్స్ లో 60 శాతం, సినిమా థియేటర్లు, జిమ్ములు, స్విమ్మింగ్ ఫూల్, పబ్లిక్ ట్రాన్స్ పోర్ట్ సర్వీసులలో 50 శాతం మందికే అనుమతి ఉంటుంది. అలాగే ఫుజైరా మున్సిపాలిటీ పరిధిలో అన్ని మ్యూజిక్ ఈవెంట్లు, ఇతర వేడుకలను రద్దు చేశారు. జన సమీకరణకు అవకాశం ఉండే ఈవెంట్లకు అనుమతి ఉండదని అధికారులు స్పష్టం చేశారు. సేవా రంగంలో విధులు నిర్వహిస్తున్న ఉద్యోగులు అందరూ ఖచ్చితంగా రెండు వారాలకు ఓ సారి పీసీఆర్ టెస్ట్ చేయించుకోవాలని సూచించారు.