దోహా, ఖతార్: కువైట్ అంతర్జాతీయ విమానాశ్రయానికి వెళ్తున్న గల్ఫ్ ఎయిర్ ఫ్లైట్ - GF213 కు బాంబు బెదిరింపు కాల్ వచ్చింది. అనంతరం విమానాన్ని పూర్తిగా తనిఖీ చేయగా, అది ఫేక్ అని తేలింది. ఈ తనిఖీ ఫోటోలను కువైట్‌లోని పౌర విమానయాన డైరెక్టరేట్ జనరల్ (DGCA) తన సోషల్ మీడియాలో పంచుకుంది.

"కువైట్ అంతర్జాతీయ విమానాశ్రయంలో భద్రతా విధానాలు, ప్రోటోకాల్‌ల ప్రకారం.. అంతర్గత వ్యవహారాల మంత్రిత్వ శాఖ, సంబంధిత అధికారులతో పూర్తి సమన్వయంతో నివేదికను వెంటనే అందజేసారు." అని DGCA పేర్కొంది. విమానం సురక్షితంగా ల్యాండ్ అయిన తర్వాత, అటువంటి నివేదికలను ఎదుర్కోవడానికి ముందుగా ఏర్పాటు చేసిన అన్ని భద్రతా ప్రణాళికలు అమలు చేసినట్లు తెలిపారు.  ఈ బాంబు బెదిరింపునకు కారణమైన వ్యక్తిని అరెస్టు చేశామని, అతనిపై భద్రతా చర్యలు తీసుకున్నారని డైరెక్టరేట్ జనరల్ ఆఫ్ సివిల్ ఏవియేషన్ అధికారిక ప్రతినిధి అబ్దుల్లా అల్-రాజి తెలిపారు.