అమెరికా: ఫిలడెల్ఫియాకు చెందిన 15 ఏళ్ల బహుముఖ ప్రతిభాశాలి అద్వైత్ బొందుగుల, ఉత్తర అమెరికా తెలుగు సంఘం (TANA) ఆధ్వర్యంలో మిషిగన్ రాష్ట్రం డెట్రాయిట్/నోవీలో జూలై 3 నుండి 5 వరకు జరిగిన 24వ ద్వైవార్షిక తానా సదస్సులో నిర్వహించిన ప్రతిష్ఠాత్మక 'ధిమ్‌ తానా' జాతీయ పోటీల్లో సీనియర్స్ విభాగంలో ప్రథమ బహుమతి సాధించి తెలుగు సమాజానికి గర్వకారణంగా నిలిచారు.

అద్వైత్ బొందుగుల,భారతీయ శాస్త్రీయ (కర్ణాటిక్) సంగీతం, ఫిల్మీ సింగింగ్ విభాగాల్లో విజేతగా నిలవడం విశేషం. ఇదే కాకుండా, గత 2023 సంవత్సరంలో ఫిలడెల్ఫియాలో జరిగిన 23వ తానా సదస్సులో కూడా అదే రెండు విభాగాల్లో జాతీయ స్థాయిలో విజేతగా నిలిచారు. రెండు వరుస తానా సదస్సుల్లో విజేతగా నిలిచిన అద్వైత్, తన ప్రతిభతో అందరి ప్రశంసలు అందుకున్నారు.
కేవలం గాయకుడిగానే కాక, అద్వైత్ బహుముఖ ప్రతిభ కలిగిన సంగీతకారుడు.  శాస్త్రీయ సంగీత వాయిద్యాలైన వైలిన్, శ్రావ్యమైన శక్సోఫోన్ వాయిద్యాల్లో కూడా ప్రావీణ్యం సాధించారు. దేశీయ, ప్రాంతీయ స్థాయిలో నిర్వహించే అనేక సంగీత కార్యక్రమాల్లో పాల్గొని అనేక అవార్డులు గెలుచుకున్నారు.

ధిమ్‌ తానా పోటీలు ఉత్తర అమెరికా తెలుగు సంఘం (TANA) 48 సంవత్సరాల సుదీర్ఘ చరిత్ర కలిగిన సంస్థ నిర్వహించే ద్వైవార్షిక జాతీయ స్థాయి సంగీత, సాంస్కృతిక పోటీలు. తెలుగు భాష, సంస్కృతి, కళలు, సమాజ హితాన్ని అమెరికా, కెనడాలోని తెలుగు ప్రజల్లో ప్రోత్సహించడమే తానా లక్ష్యం.ఈసారి సదస్సుకు ఉత్తర అమెరికా నలుమూలల నుండి 10,000 మందికి పైగా హాజరయ్యారు.

2025 ధిమ్‌ తానా విజేతలకు ప్రసిద్ధ తెలుగు సినీ సంగీత దర్శకుడు ఆర్.పీ.పట్నాయక్ బహుమతులు ప్రదానం చేశారు.