కవిత్వం, సంగీతం, గాఢమైన ప్రేమ భావోద్వేగాల సమ్మేళనంగా తెరకెక్కిన రొమాంటిక్ మ్యూజికల్ లవ్ డ్రామా చిత్రం ‘మరువ తరమా’. ఈ సినిమా ట్రైలర్‌ను కోలీవుడ్ అగ్ర దర్శకుడు కార్తిక్ సుబ్బరాజ్ తన సోషల్ మీడియా వేదికగా విడుదల చేసి, చిత్ర బృందానికి ప్రత్యేక అభినందనలు తెలియజేశారు. భావోద్వేగాలను పలికించే లోతైన సన్నివేశాలు, హృదయాన్ని తాకే సంగీతం, మరియు కవిత్వంలా సాగే కథనంతో రూపొందిన ఈ ట్రైలర్ ఇప్పటికే సోషల్ మీడియాలో మంచి హైప్ ను సృష్టించింది. ముఖ్యంగా ఇందులో నటించిన హరీష్ ధనుంజయ, అతుల్య చంద్ర, అవంతిక హరి నల్వాల మధ్య కనిపించే సహజమైన కెమిస్ట్రీ ప్రేక్షకులను ఆకట్టుకుంటోంది. ఈ ప్రేమకథలోని తీయదనం, వియోగంలోని నొప్పి వంటి నిజమైన భావోద్వేగాలు కథకు మరింత లోతును పెంచుతున్నాయని విమర్శకుల ప్రశంసలు అందుకుంది.

చైతన్య వర్మ నడింపల్లి రచన మరియు దర్శకత్వంలో రూపుదిద్దుకున్న ఈ చిత్రం, ప్రేమను కేవలం ఒక భావోద్వేగంగా కాకుండా, సంగీతంతో అల్లిన ఒక కవితాత్మక ప్రయాణంగా చూపించే ప్రయత్నం చేసింది. సిల్వర్ స్క్రీన్ పిక్చర్స్ బ్యానర్‌పై రమణ మూర్తి గిడుతూరి మరియు రుద్రరాజు ఎన్.వి. విజయ్‌కుమార్ రాజు ఈ చిత్రాన్ని నిర్మించారు. ఈ సినిమా సాంకేతిక విలువలు కూడా ప్రత్యేకంగా నిలుస్తున్నాయి. విజయ్ బుల్గానిన్ & అరిష్ అందించిన సంగీతం ఇప్పటికే విడుదలైన పాటల ద్వారా భారీ స్పందనను సాధించింది. ప్రతి పాటలోనూ మెలోడి, సాహిత్యం, మరియు ఫీల్ ఒక కవితాత్మక ఆత్మను కలిగి ఉన్నాయి. అలాగే, రుద్ర సాయి సినిమాటోగ్రఫీ ప్రతి ఫ్రేమ్‌లోనూ ప్రేమ గాలిని, కవిత్వపు నెమ్మదిని ప్రతిబింబిస్తూ విజువల్స్‌ను అందంగా తీర్చిదిద్దారు. ఎడిటర్ కె.ఎస్.ఆర్ కథనానికి కావాల్సిన భావ ప్రవాహాన్ని, పేస్‌ను సమర్థవంతంగా కాపాడారు.

ఈ సినిమా క్రేజ్‌ను మరింత పెంచుతూ, ప్రముఖ దర్శకుడు అజయ్ భూపతి కూడా ట్రైలర్‌ను అభినందిస్తూ చిత్ర బృందానికి శుభాకాంక్షలు తెలియజేశారు. ఇండస్ట్రీలోని ముఖ్య వ్యక్తుల నుండి వస్తున్న ఈ ప్రశంసలు ‘మరువ తరమా’ చిత్రం పై అంచనాలను మరింత పెంచాయి. కవిత్వంలా ప్రవహించే కథ, సంగీతంతో నిండిన భావాలు, హృదయానికి దగ్గరగా ఉండే ప్రేమ కథ ఈ అంశాలన్నీ కలిపి ఈ చిత్రాన్ని ప్రత్యేకంగా నిలబెడుతున్నాయి. ప్రేమ, సంగీతం మరియు భావోద్వేగాల ప్రపంచంలో ప్రేక్షకులను తీసుకెళ్లడానికి ‘మరువ తరమా’ చిత్రం నవంబర్ 28న థియేటర్స్‌లో గ్రాండ్‌గా విడుదలకు సిద్ధమవుతోంది.