దుబాయ్: దుబాయ్ లో పుట్టినరోజున రోడ్డుపై ప్రమాదకరమైన స్టంట్‌ చేసిన వ్యక్తి జైలు పాలయ్యాడు. దానికి సంబంధించిన వీడియోలు సోషల్ మీడియాలో వైరల్ కావడంతో పోలీసులు రంగంలోకి దిగి అతడిని అరెస్టు చేశారు.  తన పుట్టినరోజు వేడుకల కోసం అత్యంత మండే పదార్థాన్ని ఉపయోగించి బహిరంగంగా వీధుల్లో మంటలు పెట్టిన ఒక యువకుడిని అరెస్టు చేసినట్లు దుబాయ్ పోలీసులు తెలిపారు. 

దుబాయ్ పోలీసుల జనరల్ డిపార్ట్‌మెంట్ ఆఫ్ ట్రాఫిక్ డైరెక్టర్ బ్రిగేడియర్ జుమా బిన్ సువైదాన్ ప్రకారం, ఈ స్టంట్ ట్రాఫిక్ చట్టాలను స్పష్టంగా ఉల్లంఘించడమే కాకుండా ఇతరుల జీవితాలు, ఆస్తికి ముప్పు కలిగించే నిర్లక్ష్య ప్రవర్తన కిందకు వస్తుందని పేర్కొన్నారు.

ఇటువంటి ఉల్లంఘనలకు Dh2,000 వరకు జరిమానా, 23 బ్లాక్ పాయింట్లు మరియు 60 రోజుల వరకు వాహన సీజ్ కు దారితీస్తుందని హెచ్చరించారు. తల్లిదండ్రులు తమ పిల్లలను పర్యవేక్షించాలని, ఆన్‌లైన్‌లో ప్రమాదకర కంటెంట్‌ను అనుకరించడం వల్ల కలిగే ప్రమాదాల గురించి వారికి అవగాహన కల్పించాలని దుబాయ్ పోలీసులు సూచించారు.