అఖిల్ అక్కినేని కథానాయకుడిగా మురళీ కిషోర్ అబ్బురు దర్శకత్వంలో తెరకెక్కుతున్న హై-వోల్టేజ్ యాక్షన్ డ్రామా ‘లెనిన్’. నేడు అఖిల్ పుట్టినరోజును పురస్కరించుకుని, ఈ సినిమాను జూన్ 26న ప్రపంచవ్యాప్తంగా విడుదల చేయనున్నట్లు నిర్మాతలు ప్రకటించారు. అఖిల్ కెరీర్‌లో ఈ చిత్రం అత్యంత కీలకం కావడంతో, దీనిపై భారీ అంచనాలు నెలకొన్నాయి. ఈ కొత్త రిలీజ్ డేట్‌తో అక్కినేని ఫ్యాన్స్‌లో కొత్త ఉత్సాహం నెలకొంది.

నిజానికి ‘లెనిన్’ చిత్రాన్ని మే 1వ తేదీనే విడుదల చేయాలని మేకర్స్ మొదట ప్లాన్ చేశారు. అయితే, అదే సమయంలో గ్లోబల్ స్టార్ రామ్ చరణ్ నటిస్తున్న ‘పెద్ది’ సినిమా కూడా విడుదలకు సిద్ధంగా ఉండటంతో బాక్సాఫీస్ వద్ద పెద్ద క్లాష్ ఏర్పడే అవకాశం కనిపించింది. రెండు భారీ చిత్రాలు ఒకేసారి తలపడితే వసూళ్లపై ప్రభావం పడుతుందనే ఉద్దేశంతో, చిత్ర బృందం వెనక్కి తగ్గి జూన్ 26ను ఎంచుకుంది. మరోవైపు రామ్ చరణ్ ‘పెద్ది’ చిత్రానికి సంబంధించిన కొత్త రిలీజ్ డేట్ గురించి త్వరలోనే అధికారిక ప్రకటన వెలువడే అవకాశం ఉంది.