బర్కాః ఒమన్ లో సముద్ర జీవావరణ వ్యవస్థలను పరిరక్షించడానికి వీలుగా దైమానియత్ ఐస్ లాండ్ నేచర్ రిజర్వ్‌లో కోరల్ రిఫ్ కల్టివేషన్ ప్రాజెక్టును ఎన్విరాన్ మెంట్ అథారిటీ ప్రారంభించింది. 600 నుండి 1,000 రిఫ్ ముక్కలను నాటడం ద్వారా, ఈ రిజర్వ్‌లోని అరుదైన పగడపు దిబ్బలను పునరుద్ధరించడం ఈ ప్రాజెక్టు లక్ష్యమని అథారిటీ తెలిపింది. ఇది సముద్ర జీవులకు, ముఖ్యంగా గ్రూపర్ (హమౌర్) వంటి అధిక ఆర్థిక విలువ కలిగిన జాతులకు సహజ ఆవాసాలను అందించడంలో దోహదపడుతుందన్నారు.

అలాగే, ఈ ప్రాజెక్ట్‌లో భాగంగా జీవ మరియు పర్యావరణ సర్వేలను నిర్వహించనున్నారు. సాగు చేసిన పగడపు దిబ్బల పెరుగుదల రేట్లను నిరంతరం పర్యవేక్షించడం జరుగుతుందని తెలిపారు. ఈ ప్రాజెక్ట్‌ను సుల్తాన్ ఖబూస్ విశ్వవిద్యాలయం విద్యా భాగస్వామిగా, ఒమన్ లిక్విఫైడ్ నేచురల్ గ్యాస్ (ఒమన్ ఎల్‌ఎన్‌జి) కంపెనీ మద్దతుతో అమలు చేస్తున్నట్లు అథారిటీ పేర్కొంది. ఇలాంటి ప్రాజెక్టులు సముద్ర పర్యావరణ పర్యాటకానికి ఒమన్ ను ఒక ప్రముఖ గమ్యస్థానంగా మారుస్తుందని వెల్లడించింది.