ప్రపంచంలోనే అత్యధికంగా వాడుతున్న మెసేజింగ్ యాప్ వాట్సాప్ (WhatsApp) తన వినియోగదారుల కోసం మరో అద్భుతమైన ఫీచర్‌ను అందుబాటులోకి తెచ్చింది. ఇకపై చాటింగ్ చేస్తూనే నేరుగా మొబైల్ రీఛార్జ్ చేసుకునే సౌకర్యాన్ని కల్పించింది.

పేయూ (PayU) సహకారంతో కొత్త సేవలు

ప్రముఖ పేమెంట్ గేట్‌వే సంస్థ పేయూ (PayU)తో భాగస్వామ్యం కుదుర్చుకున్న మెటా సంస్థ, ఈ రీఛార్జ్ సేవలను ప్రారంభించింది. దీనివల్ల వినియోగదారులు ఇతర యూపీఐ యాప్‌లకు వెళ్లాల్సిన అవసరం లేకుండానే వాట్సాప్ ప్లాట్‌ఫామ్‌పైనే తమ సొంత నంబర్‌ను లేదా ఇతరుల నంబర్లను రీఛార్జ్ చేసుకోవచ్చు.

WhatsApp Mobile Recharge: రీఛార్జ్ ఎలా చేసుకోవాలి?

• వాట్సాప్‌లో రీఛార్జ్ చేసుకోవడం చాలా సులభం:
• వాట్సాప్ హోమ్ స్క్రీన్ పైభాగంలో ఉన్న ‘₹’ (రూపాయి) గుర్తుపై క్లిక్ చేస్తే పేమెంట్ సేవలు కనిపిస్తాయి.
• గూగుల్ పే, ఫోన్ పే తరహాలోనే మీ బ్యాంక్ ఖాతాను లింక్ చేసుకుని ఈ సేవలు పొందవచ్చు.
• ఇప్పటికే ఉన్న మనీ ట్రాన్స్‌ఫర్, క్యూఆర్ కోడ్ స్కానింగ్‌తో పాటు ఇప్పుడు మొబైల్ రీఛార్జ్ ఆప్షన్ కూడా తోడైంది.

ఆల్-ఇన్-వన్ యాప్‌గా వాట్సాప్

ప్రస్తుతం వాట్సాప్ ద్వారా మనీ ట్రాన్సాక్షన్స్ మాత్రమే కాకుండా విద్యుత్ బిల్లులు చెల్లించడం, మెట్రో టికెట్ బుకింగ్ వంటి సేవలు అందుబాటులో ఉన్నాయి. ఇప్పుడు ప్రీపెయిడ్ రీఛార్జ్ కూడా యాడ్ అవ్వడంతో, వినియోగదారులకు ఇది ఒకే చోట అన్ని పనులు పూర్తి చేసుకునే ‘ఆల్-ఇన్–వన్’ యాప్‌గా మారుతోంది.

ప్రస్తుతం కొంతమంది వినియోగదారులకు అందుబాటులోకి వచ్చిన ఈ ఫీచర్, రాబోయే కొన్ని వారాల్లో దేశవ్యాప్తంగా ఉన్న ఆండ్రాయిడ్, ఐఫోన్ యూజర్లందరికీ లభించనుంది.