హైదరాబాద్: తెలంగాణ రాష్ట్ర పోలీస్ బాస్ (DGP)గా 1991 బ్యాచ్‌కు చెందిన సీనియర్ ఐపీఎస్ అధికారి సీవీ ఆనంద్ బాధ్యతలు స్వీకరించారు. పదవీ విరమణ పొందిన బి.శివధర్ రెడ్డి స్థానంలో ఆయన ఈ అత్యున్నత బాధ్యతలను చేపట్టారు.ఇప్పటి వరకు హోంశాఖ ప్రత్యేక ప్రధాన కార్యదర్శిగా సేవలందించిన ఆయనకు మూడు దశాబ్దాలకు పైగా పోలీస్, పరిపాలనా విభాగాల్లో అపారమైన అనుభవం ఉంది.

కెరీర్ ప్రారంభం, కీలక బాధ్యతలు
సీవీ ఆనంద్ తన పోలీస్ ప్రస్థానాన్ని వరంగల్ జిల్లాలో అసిస్టెంట్ సూపరింటెండెంట్ ఆఫ్ పోలీస్ (ASP)గా ప్రారంభించారు. కెరీర్ తొలి తొమ్మిదేళ్ల పాటు వరంగల్, ఆదిలాబాద్, నిజామాబాద్ వంటి నక్సల్స్ ప్రభావిత జిల్లాల్లో పని చేశారు.క్షేత్రస్థాయిలో నక్సల్స్ ఏరివేత ఆపరేషన్లలో స్వయంగా పాల్గొని పలు ఎన్‌కౌంటర్లలో సాహసాన్ని ప్రదర్శించారు.
నగర పోలీస్ కమిషనర్‌గా హైదరాబాద్, సైబరాబాద్ పోలీస్ కమిషనర్‌గా పనిచేసి మెట్రో పాలిటన్ పోలీసింగ్‌లో తనదైన ముద్ర వేశారు. అలాగే విజయవాడ కమిషనర్‌గా కూడా సేవలందించారు.