ఐపీఎల్ 2026లో భాగంగా గుజరాత్ టైటాన్స్ (GT), సన్ రైజర్స్ హైదరాబాద్ (SRH) మధ్య జరిగిన కీలక పోరులో గుజరాత్ ఘనవిజయం సాధించింది. అహ్మదాబాద్ వేదికగా జరిగిన ఈ మ్యాచ్‌లో గుజరాత్ టైటాన్స్ ఆల్‌రౌండ్ ప్రదర్శనతో అదరగొట్టింది. 169 పరుగుల లక్ష్యంతో బరిలోకి దిగిన సన్‌రైజర్స్ హైదరాబాద్, గుజరాత్ బౌలర్ల ధాటికి కేవలం 86 పరుగులకే కుప్పకూలింది. ఈ విజయంతో గుజరాత్ టైటాన్స్ ఐపీఎల్ 2026 పాయింట్ల పట్టికలో అగ్రస్థానానికి చేరుకుంది.

స్టార్ బ్యాటర్లతో నిండిన సన్‌రైజర్స్ బ్యాటింగ్ లైనప్ పేకమేడలా కూలిపోయింది. అభిషేక్ శర్మ, ట్రావిస్ హెడ్, ఇషాన్ కిషన్ మరియు హెన్రిచ్ క్లాసెన్ వంటి దిగ్గజాలు దారుణంగా విఫలమయ్యారు. 14.5 ఓవర్లలోనే 86 పరుగులకు SRH ఆలౌట్ అయ్యింది. చివరి వికెట్‌గా ప్రఫుల్ హింగేను రషీద్ ఖాన్ అవుట్ చేయగా, జోస్ బట్లర్ మెరుపు వేగంతో స్టంపింగ్ పూర్తి చేశాడు.

గుజరాత్ బౌలర్లలో కగిసో రబడా 3 వికెట్లతో చెలరేగగా, జేసన్ హోల్డర్ 2 వికెట్లు, మహమ్మద్ సిరాజ్ ఒక వికెట్ పడగొట్టారు. చివర్లో రషీద్ ఖాన్ తన మ్యాజిక్‌తో మ్యాచ్‌ను ముగించాడు. సీజన్‌లోనే ఇది అత్యుత్తమ బౌలింగ్ ప్రదర్శనల్లో ఒకటిగా నిలిచింది.