యూఏఈః సోషల్ మీడియాలో పోస్ట్ చేసిన ఒక వీడియో ద్వారా మొరాకోలో బాల్య వివాహాలను ప్రోత్సహించినందుకు, అబుదాబిలోని ఒక కోర్టు ఒక ఎమిరాటీ వ్యక్తికి మూడేళ్ల జైలు శిక్ష మరియు Dh5 మిలియన్ల జరిమానా విధించింది.

అబుదాబి ఫెడరల్ కోర్ట్ ఆఫ్ అప్పీల్ ఆ అభ్యంతరకర వీడియోను తొలగించాలని, అలాగే దోషి అయిన సైఫ్ సలేం సైఫ్ అలీ అల్ ముక్బాలి (50 ఏళ్లు)కి చెందిన అన్ని సోషల్ మీడియా ఖాతాలను నిలిపివేయాలని కూడా ఆదేశించింది.
ఈ కేసులో జరిగిన దర్యాప్తులో అల్ ముక్బాలి దేశద్రోహం, ద్వేషం మరియు సామాజిక వివక్షను రెచ్చగొట్టేలా.. అలాగే ఎమిరాటీ మరియు మొరాకో ప్రజల మధ్య సోదర సంబంధాలకు భంగం కలిగించేలా వ్యాఖ్యలు చేసినట్లు కోర్టు నిర్ధారించింది. మొరాకో చట్టాలు ఇటువంటి చర్యలను అనుమతిస్తాయని తప్పుగా పేర్కొంటూ, మొరాకోలో బాలికల బాల్య వివాహాలను ప్రోత్సహించే మరియు వాటికి పిలుపునిచ్చే వీడియోను అల్ ముక్బాలి ప్రచురించినట్లు దర్యాప్తులో వెల్లడైంది. దీంతో, అల్ ముక్బాలిపై  విచారణ జరపాలని యూఏఈ అటార్నీ జనరల్ డాక్టర్ హమద్ సైఫ్ అల్ షమ్సీ  ఆదేశాలు జారీ చేశారు.