దుబాయ్: వేసవి సెలవుల సీజన్‌ను ఆసరాగా చేసుకుని నకిలీ ట్రావెల్ ప్యాకేజీలు, హోటల్ బుకింగ్‌లు, విమాన టికెట్ ఆఫర్ల పేరుతో మోసాలకు పాల్పడుతున్న సైబర్ నేరగాళ్ల పై ప్రజలు అప్రమత్తంగా ఉండాలని దుబాయ్ పోలీసులు హెచ్చరించారు.

తమ #BewareOfFraud అవగాహన కార్యక్రమంలో భాగంగా జారీ చేసిన ప్రకటనలో, వేసవి సెలవులకు తక్కువ ధరల్లో పర్యటనలు బుక్ చేసుకోవాలనుకునే వ్యక్తులు, కుటుంబాలనే మోసగాళ్లు ఎక్కువగా లక్ష్యంగా చేసుకుంటున్నారని పోలీసులు తెలిపారు.

దుబాయ్ పోలీసుల క్రిమినల్ ఇన్వెస్టిగేషన్ విభాగంలోని యాంటీ-ఫ్రాడ్ సెంటర్ ప్రకారం, మార్కెట్ ధరల కంటే చాలా తక్కువ ధరలకు ట్రావెల్ ప్యాకేజీలు, హోటల్ బుకింగ్‌లు, విమాన టికెట్లు అందిస్తున్నట్లు ప్రకటనలు ఇచ్చి, ముందుగానే డబ్బులు చెల్లించాలని బాధితులను ఒత్తిడి చేస్తున్నారు.

ఈ మోసాల కోసం నిందితులు ప్రముఖ ట్రావెల్ ఏజెన్సీలు, లైసెన్స్ పొందిన టూరిజం సంస్థల పేర్లు, లోగోలు ఉపయోగించి నకిలీ వెబ్‌సైట్లు, సోషల్ మీడియా ఖాతాలు సృష్టిస్తున్నారని పోలీసులు తెలిపారు. వాట్సాప్, ఫోన్ కాల్స్ ద్వారా సంప్రదించి, "ఆఫర్ ముగియబోతోంది", "కొన్ని సీట్లు మాత్రమే మిగిలి ఉన్నాయి" అంటూ వెంటనే చెల్లింపులు చేయాలని ఒత్తిడి తెస్తున్నారని పేర్కొన్నారు.

డబ్బు వ్యక్తిగత బ్యాంకు ఖాతాలకు లేదా అనుమానాస్పద చెల్లింపు లింక్‌లకు పంపిన తర్వాతే తాము మోసపోయినట్లు బాధితులు గుర్తిస్తున్నారని, అప్పటికే విమాన టికెట్లు లేదా హోటల్ రిజర్వేషన్లు అసలు లేవని తెలుస్తోందని పోలీసులు వెల్లడించారు.

ప్రజలు అత్యంత ఆకర్షణీయంగా కనిపించే ఆఫర్ల విషయంలో అప్రమత్తంగా ఉండాలని, కేవలం లైసెన్స్ పొందిన ట్రావెల్ ఏజెన్సీలు, అధికారిక వెబ్‌సైట్ల ద్వారానే బుకింగ్‌లు చేయాలని సూచించారు. వ్యక్తిగత లేదా తెలియని బ్యాంకు ఖాతాలకు డబ్బులు పంపకూడదని, బ్యాంక్ కార్డు వివరాలు, ఓటీపీలు, పాస్‌వర్డ్‌లను ఎవరికీ చెప్పొద్దని హెచ్చరించారు.

అనుమానాస్పద వెబ్‌సైట్లు లేదా మోసపూరిత కార్యకలాపాలు కనిపిస్తే దుబాయ్ పోలీసుల e-Crime ప్లాట్‌ఫారమ్ ద్వారా లేదా అత్యవసరం కాని ఫిర్యాదుల కోసం 901 నంబర్‌కు సమాచారం అందించాలని పోలీసులు ప్రజలకు సూచించారు.