మస్కట్: ఒమాన్ జనరల్ ఫెడరేషన్ ఆఫ్ ఒమాన్ వర్కర్స్ (GFOW) మే 2026 నెలకు సంబంధించిన పనితీరు నివేదికను విడుదల చేసింది. ఈ నివేదిక ప్రకారం, మే నెలలో వ్యక్తిగత, సామూహికంగా వచ్చిన 15 కార్మిక ఫిర్యాదులకు సంస్థ సహాయ సేవలు అందించింది.

ఈ ఫిర్యాదుల్లో 10 కేసులను విజయవంతంగా పరిష్కరించగా, రెండు కేసులను న్యాయస్థానానికి పంపించారు. మరో మూడు కేసులు ఇంకా విచారణలో ఉన్నట్లు జీఎఫ్‌వో‌డబ్ల్యూ వెల్లడించింది.

అదే సమయంలో 59 న్యాయపరమైన ప్రశ్నలకు, సలహాలకు స్పందించినట్లు తెలిపింది. అలాగే రెండు కొత్త కార్మిక సంఘాల ఏర్పాటును పర్యవేక్షించడంతో పాటు, నాలుగు ఇప్పటికే ఉన్న కార్మిక సంఘాలను చట్టపరమైన నిబంధనలకు అనుగుణంగా తీసుకురావడంలో సహకరించింది.

మే నెలలో పరిష్కరించిన ప్రధాన అంశాల్లో వేతనాలు, సెలవు హక్కులు, పని గంటలు, వార్షిక వేతన పెంపులు, ప్రాజెక్టుల మధ్య ఉద్యోగ బదిలీలు, ఉద్యోగ ఒప్పందాల రద్దు వంటి సమస్యలు ఉన్నాయి. అదనంగా విదేశీ కార్మికుల ప్రత్యేక అభ్యర్థనలు, సముద్ర రవాణా (మారిటైమ్) రంగానికి సంబంధించిన సమస్యలను కూడా జీఎఫ్‌వో‌డబ్ల్యూ పరిశీలించి అవసరమైన చర్యలు తీసుకున్నట్లు నివేదికలో పేర్కొంది.

కార్మికుల హక్కుల పరిరక్షణ, కార్మిక-యాజమాన్య సంబంధాల మెరుగుదల, చట్టబద్ధమైన కార్మిక సంఘాల బలోపేతానికి తమ సంస్థ కట్టుబడి పనిచేస్తోందని జీఎఫ్‌వో‌డబ్ల్యూ తెలిపింది.