దుబాయ్: అధికారికం కాని, విశ్వసనీయత లేని యాప్‌లను డౌన్‌లోడ్ చేయవద్దని దుబాయ్ పోలీసులు ప్రజలను హెచ్చరించారు. ఇటువంటి యాప్‌లలో దాగి ఉండే హానికరమైన సాఫ్ట్‌వేర్ (MALWARE) ద్వారా సైబర్ నేరగాళ్లు స్మార్ట్‌ఫోన్‌లలోకి చొరబడి వ్యక్తిగత, బ్యాంకింగ్ సమాచారాన్ని దొంగిలించి బ్యాంకు ఖాతాల్లోని డబ్బును కాజేస్తున్నట్లు వెల్లడించారు.

దుబాయ్ పోలీసుల జనరల్ డిపార్ట్‌మెంట్ ఆఫ్ క్రిమినల్ ఇన్వెస్టిగేషన్‌కు చెందిన ఈ-క్రైమ్స్ అండ్ సైబర్ సెక్యూరిటీ విభాగం విడుదల చేసిన అవగాహన వీడియోలో మోసగాళ్ల పని తీరును వివరించింది. బ్యాంకింగ్, పెట్టుబడులు, డెలివరీ సేవలు, సెక్యూరిటీ అప్‌డేట్లు వంటి ప్రజలకు ఆసక్తి కలిగించే అంశాల పేరుతో నకిలీ యాప్‌లను రూపొందించి, వాటిని డౌన్‌లోడ్ చేయించేలా మోసగాళ్లు ఉచ్చులు వేస్తున్నారని తెలిపింది.

ఈ యాప్‌లను ఒకసారి డౌన్‌లోడ్ చేసిన తర్వాత, బాధితులకు తెలియకుండానే సైబర్ నేరగాళ్లు వారి మొబైల్ ఫోన్‌లపై నియంత్రణ సాధించి, వ్యక్తిగత వివరాలు, బ్యాంకింగ్ సమాచారం సేకరించి ఆర్థిక మోసాలకు పాల్పడుతున్నారని పోలీసులు హెచ్చరించారు.

ప్రజలు గూగుల్ ప్లే స్టోర్, యాపిల్ యాప్ స్టోర్ వంటి అధికారిక యాప్ స్టోర్ల నుంచే యాప్‌లను డౌన్‌లోడ్ చేయాలని, పాస్‌వర్డ్‌లు లేదా ఓటీపీలు ఎవరికీ వెల్లడించవద్దని సూచించారు. అలాగే విశ్వసనీయ భద్రతా సాఫ్ట్‌వేర్‌ను వినియోగించడం, బ్యాంకింగ్ అలర్ట్‌లను యాక్టివేట్ చేసుకోవడం, అనుమానాస్పద లింక్‌లపై క్లిక్ చేయకుండా ఉండాలని సూచించారు.

డిజిటల్ అవగాహనే సైబర్ మోసాల నుంచి రక్షణకు తొలి రక్షణ కవచమని పేర్కొన్న దుబాయ్ పోలీసులు, ఎలాంటి మోసపూరిత ప్రయత్నాలు ఎదురైనా వెంటనే దుబాయ్ పోలీస్ స్మార్ట్ యాప్, 901 హెల్ప్‌లైన్ లేదా eCrime పోర్టల్ ద్వారా ఫిర్యాదు చేయాలని ప్రజలకు విజ్ఞప్తి చేశారు.