రియాద్: సౌదీ అరేబియా ప్రభుత్వం డొమెస్టిక్ వర్కర్స్ కోసం ఇకామా (రెసిడెన్సీ పర్మిట్) రెన్యూవల్ విధానంలో కీలక మార్పులు చేసింది. ఇకపై యజమానులు 3 నెలల నుంచే ఇకామాను జారీ చేయడం లేదా పునరుద్ధరించడం చేసుకునే సౌకర్యాన్ని కల్పించింది. సౌదీ అంతర్గత వ్యవహారాల మంత్రిత్వ శాఖ (Ministry of Interior).. జనరల్ డైరెక్టరేట్ ఆఫ్ పాస్‌పోర్ట్స్ (జవాజాత్), మానవ వనరులు మరియు సామాజిక అభివృద్ధి మంత్రిత్వ శాఖ, ముసానెడ్ ప్లాట్‌ఫామ్‌ల సహకారంతో ఈ కొత్త సేవను ప్రారంభించింది.

కొత్త నిబంధనల ప్రకారం గృహ కార్మికుల ఇకామాను 3, 6, 9, 12, 15, 18, 21 లేదా 24 నెలల కాలానికి జారీ చేయవచ్చు లేదా రెన్యూవల్ చేసుకోవచ్చు. గతంలో మాత్రం 1 సంవత్సరం లేదా 2 సంవత్సరాల కాలానికే రెన్యూవల్ అవకాశం ఉండేది. అలాగే, యజమానులు ఎంచుకున్న కాలానికి మాత్రమే ఇకామా ఫీజు చెల్లించే వెసులుబాటు కల్పించారు. దీంతో 3 నెలలు లేదా 3 నెలల గుణితకాలానికి రెన్యూవల్ చేస్తే క్వార్టల్లీ ప్రాతిపదికన ఫీజులు చెల్లించవచ్చు. ఈ నిర్ణయంతో యజమానులపై ఒకేసారి పడే ఆర్థిక భారం తగ్గడంతో పాటు, వారి అవసరాలకు అనుగుణంగా మరింత సౌలభ్యం లభిస్తుందని సౌదీ ప్రభుత్వం తెలిపింది. డిజిటల్ సేవలను విస్తరించడం, ప్రభుత్వ సేవలను మరింత సమర్థవంతంగా అందించడం లక్ష్యంగా ఈ మార్పులు తీసుకొచ్చినట్లు అధికారులు వెల్లడించారు.