దోహా: 2026–27 విద్యా సంవత్సరానికి సన్నాహాల్లో భాగంగా ఖతర్ విద్య, ఉన్నత విద్యాశాఖ మంత్రి లోల్వా బింత్ రషీద్ బిన్ మొహమ్మద్ అల్ ఖాతేర్ ఆరు కొత్త ప్రభుత్వ పాఠశాలలను ప్రారంభిస్తూ ఉత్తర్వులు జారీ చేశారు. కొత్తగా అల్ సఖామాలో ఖతర్ సైన్స్ అండ్ టెక్నాలజీ ప్రిపరేటరీ అండ్ సెకండరీ స్కూల్(బాయ్స్, రౌదత్ అల్ హమామాలో ఖతర్ సైన్స్ అండ్ టెక్నాలజీ సెకండరీ స్కూల్ (గర్ల్స్), ఐన్ ఖాలెద్ సెకండరీ స్కూల్ (బాయ్స్), దోహా ప్రిపరేటరీ స్కూల్ (గర్ల్స్), అల్ థఖీరా ప్రైమరీ స్కూల్ (బాయ్స్), ముఐథర్ ప్రైమరీ స్కూల్ (బాయ్స్) స్కూళ్లను ప్రారంభించనున్నారు.

అలాగే, 17 మంది ప్రన్సిపల్స్ ను కొత్తగా నియమించడంతోపాటు మరో 17 మంది ప్రిన్సిపల్స్ ను బదిలీ చేస్తూ ఉత్తర్వులు జారీ చేశారు. కొత్త విద్యా సంవత్సరం ప్రారంభానికి ప్రభుత్వ పాఠశాలలను మరింత సన్నద్ధం చేయడం, పాఠశాలల పరిపాలనా సామర్థ్యాన్ని పెంచడం, విద్యా వ్యవస్థను అభివృద్ధి చేయడం లక్ష్యంగా ఈ నిర్ణయం తీసుకున్నట్లు విద్యాశాఖ తెలిపింది. ఖతర్ నేషనల్ విజన్–2030లోని మానవ అభివృద్ధి లక్ష్యాలకు అనుగుణంగా విద్యపై పెట్టుబడులు పెంచడం, మానవ వనరుల సామర్థ్యాలను అభివృద్ధి చేయడం ద్వారా దేశ సుస్థిర అభివృద్ధికి ఈ చర్య దోహదపడుతుందని అధికారులు పేర్కొన్నారు.