కువైట్: ఆన్‌లైన్ ద్వారా నగదు బదిలీలపై కువైట్‌లోని ఎక్స్ఛేంజ్ కంపెనీలు నిబంధనలను కఠినతరం చేశాయి. కొన్ని సంస్థలు డిజిటల్ యాప్‌ల ద్వారా రోజువారీగా బదిలీ చేసే మొత్తాన్ని 2,500 కువైట్ దినార్లకు (KD) తగ్గించాయి. గతంలో కొన్ని కంపెనీల్లో ఈ పరిమితి 10,000 దినార్ల వరకు ఉండేది. ఈ కొత్త నిబంధనలు కువైట్ పౌరులతో పాటు ప్రవాసులకూ వర్తిస్తాయి. ఆర్థిక లావాదేవీలపై పర్యవేక్షణను బలోపేతం చేయడం, మోసాలను అరికట్టడం, అక్రమ లావాదేవీల కోసం డిజిటల్ మార్గాలను దుర్వినియోగం చేయకుండా చూడటం లక్ష్యంగా ఈ చర్యలు చేపట్టారు. కొన్ని ఎక్స్ఛేంజ్ సంస్థలు రోజువారీ ఆన్‌లైన్ బదిలీ పరిమితిని 3,000 దినార్లుగా నిర్ణయించాయి.

భారీ మొత్తాల బదిలీకి పత్రాలు తప్పనిసరి

2,500 కువైట్ దినార్లకు మించి పెద్ద మొత్తంలో డబ్బు బదిలీ చేయాలనుకునే కస్టమర్లు బ్యాంక్ స్టేట్‌మెంట్ లేదా డబ్బు ఎక్కడి నుంచి వచ్చిందో నిరూపించే పత్రాలను సమర్పించాల్సి రావచ్చు. కస్టమర్ ప్రకటించిన ఆదాయం, ఆర్థిక ప్రొఫైల్‌కు అనుగుణంగా లావాదేవీ మొత్తం ఉన్నప్పుడే అధిక పరిమితికి అనుమతి లభించే అవకాశం ఉంది. ఆన్‌లైన్ లావాదేవీలకు అదనపు ధృవీకరణ ప్రక్రియలను కూడా ఎక్స్ఛేంజ్ సంస్థలు అమలు చేస్తున్నాయి. ఇందులో ‘మై ఐడెంటిటీ’ (My Identity) ద్వారా గుర్తింపు నిర్ధారణతో పాటు ఇతర భద్రతా తనిఖీలు ఉంటాయి.

సైబర్ మోసాల నేపథ్యంలో చర్యలు

ఆర్థిక యాప్‌లను లక్ష్యంగా చేసుకుని హ్యాకర్లు ఖాతాల్లోకి అనధికారికంగా ప్రవేశించి కస్టమర్లకు తెలియకుండానే డబ్బు బదిలీ చేస్తున్న ఘటనలు పెరుగుతున్న నేపథ్యంలో ఈ కఠిన నిబంధనలు అమల్లోకి వచ్చాయి. ఎక్స్ఛేంజ్ సంస్థల బ్రాంచీల్లో నేరుగా చేసే లావాదేవీల విషయంలో సిబ్బంది కస్టమర్ గుర్తింపు, డబ్బు బదిలీ ఉద్దేశం, అవసరమైన పత్రాలను పరిశీలించే అవకాశం ఉంటుంది. దీంతో అనధికారిక లావాదేవీల ముప్పు తగ్గుతుంది.

నగదు లావాదేవీలపైనా పరిమితి

కువైట్ సెంట్రల్ బ్యాంక్ గతంలోనే ఒక్కో కస్టమర్ రోజువారీ నగదు లావాదేవీ పరిమితిని 3,000 దినార్ల నుంచి 1,000 కువైట్ దినార్లకు తగ్గించింది. కరెన్సీ కొనుగోలు, విక్రయం వంటి లావాదేవీలకు ఈ పరిమితి వర్తిస్తుంది. అదేవిధంగా కొన్ని ఎక్స్ఛేంజ్ సంస్థలు 3,000 దినార్లకు మించిన బదిలీలకు బ్యాంక్ స్టేట్‌మెంట్ తప్పనిసరి చేస్తున్నాయి. మరికొన్ని సంస్థలు 1,500 దినార్లు దాటిన లావాదేవీలకే ఈ పత్రాన్ని కోరుతున్నాయి. మోసం, మనీలాండరింగ్, ఇతర అక్రమ ఆర్థిక కార్యకలాపాలకు డిజిటల్ చెల్లింపు మార్గాలు వేదికగా మారకుండా నిరోధించడంతో పాటు కస్టమర్లు, దేశ ఆర్థిక వ్యవస్థను రక్షించేందుకు చేపడుతున్న విస్తృత నియంత్రణ చర్యల్లో ఇవి భాగమని అధికారులు పేర్కొంటున్నారు.