దుబాయ్: భారత్ నుంచి మెయిడ్ తీసుకురావాలనుకునే వారు పలు నిబంధనలు, అధికారిక ప్రక్రియలను పాటించాల్సి ఉంటుంది. యూఏఈలో మెయిడ్ ల నియామకానికి ఫెడరల్ డిక్రీ లా నంబర్ 9 ఆఫ్ 2022 వర్తిస్తుంది. భారత్ నుంచి నియమించుకునే సందర్భంలో వారి పాస్‌పోర్టులో ECR (Emigration Check Required) స్టేటస్ ఉండాల్సి ఉంటుందని న్యాయ నిపుణులు తెలిపారు.

యజమాని బాధ్యతలు

యూఏఈ డొమెస్టిక్ వర్కర్స్ లా లోని ఆర్టికల్ 11 ప్రకారం యజమాని తగిన వసతి కల్పించాలి, పని చేసేందుకు అవసరమైన సౌకర్యాలు అందించాలి. అలాగే అవసరమైన ఆహారం, దుస్తులు అందించాలి. జీతాన్ని సకాలంలో చెల్లించాలి. ముఖ్యంగా వైద్య సంరక్షణ కల్పించాలి.
అవసరమైన సందర్భంలో స్వదేశానికి పంపించే ఖర్చులను కూడా భరించాలి.
అదేవిధంగా మెయిడ్ బాధ్యతలను ఆర్టికల్ 12, రిక్రూట్‌మెంట్ ఏజెన్సీల బాధ్యతలను ఆర్టికల్ 5లో చట్టం నిర్దేశించింది. ఉద్యోగ ఒప్పందానికి ఆర్టికల్స్ 6, 7, పని గంటలకు ఆర్టికల్ 9, గ్రాట్యుటీ చెల్లింపులకు ఆర్టికల్ 22 వర్తిస్తాయి.

భారత ప్రభుత్వ E-Migrant పోర్టల్‌లో నమోదు

భారత్ నుంచి మెయిడ్ లను యూఏఈకి తీసుకురావాలనుకునే యజమాని ముందుగా భారత ప్రభుత్వ E-Migrant పోర్టల్లో నమోదు చేసుకోవాలి. అందులో యజమాని, ప్రతిపాదిత మెయిడ్ కు సంబంధించిన వివరాలు, అవసరమైన పత్రాలను సమర్పించాలి. అలాగే దుబాయ్‌లోని భారత కాన్సులేట్ జనరల్‌కు ఉద్దేశించిన అభ్యర్థన లేఖను కూడా సమర్పించాలి. ప్రక్రియ పూర్తయిన తర్వాత రిజిస్టర్ చేసిన ఈ-మెయిల్‌కు లాగిన్ వివరాలు అందుతాయి.

అవసరమైన డాక్యుమెంట్స్ 

E-Migrantలో రిజిస్ట్రేషన్ పూర్తయిన తర్వాత యూఏఈలో నివసిస్తున్న యజమాని తన పత్రాలను కాన్సులేట్ జనరల్ ఆఫ్ ఇండియా–దుబాయ్ లేదా కాన్సులేట్ నియమించిన సర్వీస్ ప్రొవైడర్ ద్వారా అటెస్ట్ చేయించుకోవాల్సి ఉంటుంది. గృహ కార్మికురాలితో తనకు ఎలాంటి బంధుత్వం లేదని ధృవీకరిస్తూ యజమాని అఫిడవిట్‌పై సంతకం చేయాల్సి రావచ్చు. ఈ అఫిడవిట్‌ను కూడా భారత కాన్సులేట్ ద్వారా అటెస్ట్ చేయించాలి.
యూఏఈలో వీసా కోసం అవసరమైన పత్రాలు

దుబాయ్‌లో MOHRE ఆమోదించిన సర్వీస్ ప్రొవైడర్ ద్వారా గృహ కార్మికురాలి ఎంప్లాయ్‌మెంట్ వీసా/ఎంట్రీ పర్మిట్ కోసం దరఖాస్తు చేయవచ్చు.
సాధారణంగా కింది పత్రాలు అవసరం కావచ్చు:
యజమాని పాస్‌పోర్ట్ కాపీ
యూఏఈ వీసా పేజీ
ఒరిజినల్ ఎమిరేట్స్ ID
మెయిడ్ పాస్‌పోర్ట్ కాపీ
వైట్ బ్యాక్‌గ్రౌండ్‌తో పాస్‌పోర్ట్ సైజు ఫొటో
యజమాని జీవిత భాగస్వామి పాస్‌పోర్ట్, వీసా, ఎమిరేట్స్ ID కాపీలు
భారత్, యూఏఈలో అటెస్ట్ చేసిన వివాహ ధ్రువీకరణ పత్రం
కనీసం రెండు బెడ్‌రూమ్‌ల ఇల్లు ఉన్నట్లు చూపించే టెనెన్సీ కాంట్రాక్ట్, Ejari లేదా సొంత ఇంటి టైటిల్ డీడ్
DEWA యుటిలిటీ బిల్లు
బ్యాంక్ స్టేట్‌మెంట్
ఉద్యోగ ఒప్పందం
యజమాని ఉద్యోగ సంస్థ నుంచి జారీ చేసిన జీతం ధ్రువీకరణ పత్రం
యజమాని స్వయం ఉపాధి లేదా వ్యాపారం నిర్వహిస్తుంటే, ఉద్యోగ ఒప్పందానికి బదులుగా సంస్థ/వ్యాపార లైసెన్స్ కాపీ సమర్పించాల్సి రావచ్చు. అలాగే యూఏఈలో మెయిడ్ నియమించుకునేందుకు కనీస జీతం అర్హత కూడా వర్తించవచ్చు.

ఎంట్రీ పర్మిట్ వచ్చిన తర్వాత..

MOHRE ఆమోదించిన ఫార్మాట్‌లో ఆఫర్ లెటర్, GDRFA–దుబాయ్ జారీ చేసిన ఎంట్రీ పర్మిట్ వచ్చిన తర్వాత సంబంధిత పత్రాలను సర్వీస్ ప్రొవైడర్ సెంటర్‌లో సమర్పించాలి. ఎంట్రీ పర్మిట్‌ను అటెస్ట్ చేసిన అనంతరం E-Migrant ద్వారా ఒప్పందం రూపొందుతుంది. ఆ ఒప్పందాన్ని గృహ కార్మికురాలికి పంపిస్తారు. తర్వాత అటెస్ట్ చేసిన ఎంట్రీ పర్మిట్, ఒప్పందాన్ని భారతదేశంలోని ప్రొటెక్టర్ ఆఫ్ ఇమిగ్రెంట్ (POE)కు పంపి యూఏఈకి ప్రయాణించేందుకు అవసరమైన ఎమిగ్రేషన్ క్లియరెన్స్ పొందాలి.

యూఏఈకి వచ్చిన తర్వాత

అన్ని ప్రక్రియలు పూర్తయిన తర్వాత మెయిడ్ GDRFA జారీ చేసిన ఎంట్రీ పర్మిట్‌తో యూఏఈకి రావచ్చు. వచ్చిన రెండు వారాల్లోపు యజమాని ఆమెను దుబాయ్‌లోని భారత కాన్సులేట్‌కు తీసుకెళ్లి ఎంట్రీ ఇంటర్వ్యూకు హాజరుకావాల్సి ఉంటుంది.
ఆ తర్వాత:
1. MOHRE ఉద్యోగ ఒప్పందంపై సంతకం చేయాలి.
2. ఆ ఒప్పందం ముందుగా జారీ చేసిన MOHRE ఫార్మాట్ ఆఫర్ లెటర్‌కు అనుగుణంగా ఉండాలి.
3. మెయిడ్ మెడికల్ ఫిట్‌నెస్ పరీక్ష చేయించుకోవాలి.
4. హెల్త్ ఇన్సూరెన్స్ తీసుకోవాలి.
5. యూఏఈ ID కోసం దరఖాస్తు చేయాలి.
ఎక్కడ సమాచారం పొందాలి?
తాజా నిబంధనలు, ఫీజులు, అర్హతలు, పత్రాల విషయంలో MOHRE, GDRFA, TADBEER కేంద్రం, భారత కాన్సులేట్ జనరల్–దుబాయ్ నుంచి నిర్ధారించుకోవడం మంచిది. అలాగే, భారత్ నుంచి యూఏఈకి మెయిడ్ లను తీసుకురావడంపై అదనపు సమాచారం కోసం భారత ప్రభుత్వం ఏర్పాటు చేసిన ప్రవాసీ భారతీయ సహాయత కేంద్ర (PBSK)ను కూడా సంప్రదించవచ్చు.

గమనిక: పై సమాచారం సాధారణ మార్గదర్శకత్వం కోసం మాత్రమే. వీసా, ఎమిగ్రేషన్, గృహ కార్మికుల నియామక నిబంధనలు మారవచ్చు. దరఖాస్తు చేసే ముందు సంబంధిత యూఏఈ, భారత అధికారుల వద్ద తాజా నిబంధనలను నిర్ధారించుకోవడం మంచిది.