శ్రీలంక జాతీయ విమానయాన సంస్థ ‘శ్రీలంకన్ ఎయిర్‌లైన్స్’ మిడిల్ ఈస్ట్ ప్రాంతంలో తమ విమాన కార్యకలాపాలను పూర్తి స్థాయిలో పునఃప్రారంభించింది. కొలంబో నుండి కువైట్‌కు వారానికి ఆరు విమాన సర్వీసులను తిరిగి పునరుద్ధరించడం ద్వారా ఈ కీలక నిర్ణయాన్ని అమల్లోకి తెచ్చింది. రియాద్, దమ్మామ్, దుబాయ్, దోహా మరియు కువైట్ నగరాలను కలుపుతూ విస్తరించిన ఈ నెట్‌వర్క్ ద్వారా ప్రయాణికులకు మరింత స్థిరమైన, నమ్మకమైన షెడ్యూళ్లను అందుబాటులోకి తెచ్చింది. ముఖ్యంగా కొలంబో ట్రాన్సిట్ కేంద్రంగా మధ్యప్రాచ్యం మరియు దక్షిణ భారత నగరాలైన చెన్నై, తిరుచిరాపల్లి, తిరువనంతపురం, మదురై, కొచ్చిన్‌ల మధ్య కేవలం 90 నిమిషాల లోపు నిరంతరాయ కనెక్షన్ (కనెక్టివిటీ) సౌకర్యాన్ని ప్రయాణికులకు కల్పిస్తోంది. గత నాలుగు దశాబ్దాలుగా సేవలందిస్తున్న తమ సంస్థపై ఆధారపడిన దక్షిణ భారత ప్రయాణికులకు ఆత్మీయ శ్రీలంక ఆతిథ్యంతో కూడిన నిరంతర ప్రయాణ అనుభవాన్ని అందించడమే తమ ప్రధాన ధ్యేయమని ఎయిర్‌లైన్స్ కమర్షియల్ హెడ్ దిముతు టెన్నకూన్, రీజినల్ మేనేజర్ ఫౌజాన్ ఫరీద్ తెలిపారు.

భారత మార్కెట్‌కు ప్రాధాన్యత: దక్షిణ భారత ప్రయాణికులకు ప్రత్యేక సౌకర్యాలు
భారతదేశాన్ని తమ అతిపెద్ద అంతర్జాతీయ మార్కెట్‌గా పరిగణిస్తున్న శ్రీలంకన్ ఎయిర్‌లైన్స్, భారత్ మరియు కొలంబో మధ్య వారానికి ఏకంగా 90 విమాన సర్వీసులను నడుపుతోంది. చెన్నై, ముంబై, ఢిల్లీ, హైదరాబాద్, బెంగళూరులతో పాటు దక్షిణ భారత నగరాలకు నిరంతర సేవలను అందిస్తూ ప్రాధాన్యతా క్యారియర్‌గా నిలిచింది. ప్రయాణికుల కోసం విమానంలో ప్రాంతీయ వంటకాలతో కూడిన రుచికరమైన శాకాహార, మాంసాహార ఆహార ఎంపికలను, ఇన్-ఫ్లైట్ వినోద వ్యవస్థలో భాగంగా తెలుగు, తమిళం, మలయాళం, హిందీ చిత్రాల విస్తృత ఎంపికను అందుబాటులో ఉంచింది. వీటితో పాటు దక్షిణ భారతదేశం, మధ్యప్రాచ్యం మధ్య ప్రయాణించే ఎకానమీ క్లాస్ ప్రయాణికులకు 30 కేజీల చెక్డ్ బ్యాగేజ్ మరియు 7 కేజీల క్యాబిన్ బ్యాగేజ్ అలవెన్స్ వంటి ఆకర్షణీయమైన వసతులను కల్పిస్తూ కస్టమర్ల నిరంతర మద్దతును ఆశిస్తోంది.