షార్జా: యూఏఈలో 2025 నాటికి 52 మంది బిలియనీర్లు ఉన్నారని తాజా నివేదిక వెల్లడించింది. వీరందరి కలిపిన సంపద 201 బిలియన్ డాలర్లుగా నమోదైంది. దీంతో ప్రపంచంలోని అత్యధిక బిలియనీర్లు ఉన్న టాప్-15 దేశాల జాబితాలో యూఏఈ చోటు దక్కించుకుంది. ఆల్ట్రాటా విడుదల చేసిన బిలియనీర్ సెన్సస్ 2026 నివేదిక ప్రకారం.. యూఏఈలో బిలియనీర్ల సంఖ్య అంతకుముందు ఏడాదితో పోలిస్తే 1.9 శాతం తగ్గింది. అయినప్పటికీ వారి మొత్తం సంపద 201 బిలియన్ డాలర్లుగా ఉంది.

ప్రపంచవ్యాప్తంగా 3,795 మంది బిలియనీర్లు ఉండగా.. యూఏఈలోని బిలియనీర్లు మొత్తం సంఖ్యలో సుమారు 1.4 శాతం వాటాను కలిగి ఉన్నారు. వారి సంపద ప్రపంచ బిలియనీర్ల మొత్తం సంపద 15.1 ట్రిలియన్ డాలర్లలో దాదాపు 1.3 శాతంగా ఉంది. బిలియనీర్ల సంఖ్యలో యూఏఈ 15వ స్థానంలో నిలిచింది. యూఏఈ కంటే ముందు సౌదీ అరేబియా ఉంది. సౌదీలో 59 మంది బిలియనీర్లు ఉండగా.. వారి మొత్తం సంపద 175 బిలియన్ డాలర్లుగా నమోదైంది.

బిలియనీర్ నగరాల్లో దుబాయ్
ప్రపంచంలోని బిలియనీర్లు అధికంగా నివసించే నగరాల జాబితాలో దుబాయ్ సంయుక్తంగా 8వ స్థానంలో నిలిచింది. షెన్‌జెన్‌తో కలిసి ఈ స్థానాన్ని పంచుకుంది. 2025లో దుబాయ్‌లో 43 మంది బిలియనీర్లు నివసించారు. అంతకుముందు ఏడాదితో పోలిస్తే ఈ సంఖ్య రెండుకు పెరిగింది. న్యూయార్క్, హాంకాంగ్, శాన్‌ఫ్రాన్సిస్కో, లండన్, సింగపూర్, లాస్ ఏంజెల్స్, బీజింగ్ నగరాలు దుబాయ్ కంటే ముందున్నాయి.

చమురేతర రంగాల అభివృద్ధి
మధ్యప్రాచ్యంలో 2025లో బిలియనీర్ల సంఖ్య 5 శాతం పెరిగి 254కు చేరింది. సౌదీ అరేబియా, యూఏఈల్లో చమురేతర రంగాల అభివృద్ధి, భారీ సార్వభౌమ మౌలిక వసతుల ప్రాజెక్టులు పెట్టుబడులు, కొత్త సంపద సృష్టికి దోహదం చేశాయని నివేదిక తెలిపింది. అయితే ఇదే సమయంలో మధ్యప్రాచ్య బిలియనీర్ల మొత్తం సంపద 4 శాతం తగ్గి 700 బిలియన్ డాలర్లకు పడిపోయింది. చమురు ధరలు తగ్గడం, ప్రాంతీయ స్టాక్ మార్కెట్ల పనితీరు బలహీనంగా ఉండటం దీనికి కారణాలని పేర్కొంది. 2025 చివరి నాటికి చమురు ధరలు దాదాపు 20 శాతం తగ్గాయి. 

అమెరికా టాప్ 
ప్రపంచవ్యాప్తంగా 2025లో బిలియనీర్ల సంఖ్య 8.2 శాతం పెరిగి రికార్డు స్థాయిలో 3,795కు చేరింది. ఐదేళ్లలో ఇదే అత్యంత వేగవంతమైన వార్షిక వృద్ధి అని నివేదిక తెలిపింది. వారి మొత్తం సంపద 12.8 శాతం పెరిగి 15.1 ట్రిలియన్ డాలర్లకు చేరింది. అమెరికా 1,265 మంది బిలియనీర్లతో ప్రపంచంలోనే అతిపెద్ద బిలియనీర్ మార్కెట్‌గా కొనసాగుతోంది. చైనా 363 మందితో, జర్మనీ 221 మందితో తర్వాతి స్థానాల్లో ఉన్నాయి.

బిలియనీర్ల సంపదకు ఏఐ బూస్ట్ 
ఆర్టిఫిషియల్ ఇంటెలిజెన్స్ (AI)లో పెట్టుబడులు పెట్టిన కంపెనీలు బిలియనీర్ల సంపద పెరుగుదలలో కీలక పాత్ర పోషిస్తున్నాయని ఆల్ట్రాటా తెలిపింది. బిలియనీర్ల సంపదకు అత్యధికంగా దోహదపడే 150 లిస్టెడ్ కంపెనీలను విశ్లేషించగా.. AIలో పెట్టుబడులు పెట్టిన సంస్థల మార్కెట్ విలువ 2024-25 కాలంలో ఇతర కంపెనీలతో పోలిస్తే 23 శాతం అధికంగా పెరిగింది. కాగా బిలియనీర్ల సంపదలో ఎక్కువ భాగం నగదు రూపంలో కాకుండా కంపెనీల్లో వాటాల రూపంలో ఉంటుందని నివేదిక పేర్కొంది. సగటున బిలియనీర్ల పోర్ట్‌ఫోలియోలో సుమారు 73 శాతం లిస్టెడ్ లేదా ప్రైవేట్ కంపెనీల్లో వాటాలుగా ఉండగా.. దాదాపు నాలుగో వంతు లిక్విడ్ ఆస్తులుగా ఉన్నాయి.
ప్రపంచవ్యాప్తంగా ప్రతి ఐదుగురు బిలియనీర్లలో ఒకరు ప్రస్తుతం నివసిస్తున్న దేశంలో కాకుండా మరో దేశంలో జన్మించినవారేనని నివేదిక వెల్లడించింది.