ప్రపంచవ్యాప్తంగా ఎంతో ఆసక్తిగా ఎదురుచూసిన 73వ మిస్ వరల్డ్ 2026 పోటీలలో డొమినికన్ రిపబ్లిక్‌కు చెందిన జొహైరీ మోలా డొమింగ్యూజ్ విజేతగా నిలిచారు. వియత్నాంలోని న్హా ట్రాంగ్‌లో శనివారం రాత్రి అట్టహాసంగా జరిగిన ఫైనల్స్‌లో ఆమె విశ్వసుందరి కిరీటాన్ని సొంతం చేసుకున్నారు. గత ఏడాది (మిస్ వరల్డ్ 2025) విజేత, థాయ్‌లాండ్‌కు చెందిన సుచతా చువాంగ్‌శ్రీ నూతన విజేత జొహైరీకి మిస్ వరల్డ్ కిరీటాన్ని అలంకరించారు. ఈ విజయంతో దాదాపు 44 ఏళ్ల సుదీర్ఘ విరామం తర్వాత డొమినికన్ రిపబ్లిక్‌కు మిస్ వరల్డ్ టైటిల్ దక్కింది. అంతకుముందు 1982లో మరియాసెలా అల్వారెజ్ ఆ దేశం తరఫున తొలిసారి ఈ కిరీటాన్ని గెలుచుకున్నారు.

110 దేశాల పోటీదారులు: ప్రపంచవ్యాప్తంగా 110 దేశాల నుంచి వచ్చిన సుందరీమణులతో పోటీపడి జొహైరీ మోలా ఈ ప్రతిష్ఠాత్మక టైటిల్‌ను గెలుచుకున్నారు.
రన్నరప్‌లుగా నిలిచినవారు: ఈ పోటీలో స్పెయిన్‌కు చెందిన ఎలిసబెత్ రేనెస్ ఫస్ట్ రన్నరప్‌గా, మలేషియాకు చెందిన తానుసియా శెట్టి సెకండ్ రన్నరప్‌గా నిలిచారు. వియత్నాం, ఎరిత్రియా, దక్షిణాఫ్రికా దేశాల ప్రతినిధులు టాప్ 6లో స్థానం సంపాదించారు.
వియత్నాంలో తొలిసారి: వియత్నాం దేశం మిస్ వరల్డ్ పోటీలకు ఆతిథ్యం ఇవ్వడం ఇదే తొలిసారి కావడం విశేషం.
బహుముఖ ప్రజ్ఞాశాలి: 24 ఏళ్ల జొహైరీ మోలా విద్య, మోడలింగ్, జర్నలిజం రంగాల్లో రాణిస్తున్నారు. యూనివర్సిడాడ్ ఇబెరోఅమెరికానా నుంచి బిజినెస్ మేనేజ్‌మెంట్‌లో డిగ్రీ పూర్తి చేసిన ఆమె, మోడల్‌గా చేస్తూనే సాహిత్యం మరియు సోషల్ స్టడీస్ టీచర్‌గా పనిచేస్తున్నారు. అంతేకాకుండా, యూనివిజన్ న్యూయార్క్ ఛానెల్ న్యూస్ కరస్పాండెంట్‌గా బాధ్యతలు నిర్వర్తిస్తున్నారు.
సేవా దృక్పథమే విజేతను చేసింది: “వాయిసెస్ ఆఫ్ టుమారో” పేరిట పేద పిల్లలకు ఇంగ్లీష్ విద్యను అందించే సేవా కార్యక్రమాన్ని ఆమె నిర్వహిస్తున్నారు. ఫైనల్ రౌండ్‌లో పేద పిల్లల విద్యపై ఆమె ఇచ్చిన సమాధానం న్యాయనిర్ణేతలను ఆకట్టుకోవడంతో “బ్యూటీ విత్ ఎ పర్పస్” నినాదానికి సరిగ్గా సరిపోయి విజయం ఆమెను వరించింది.