దుబాయ్: మలయాళీ సంగీత ప్రపంచంలో తీవ్ర విషాదం చోటుచేసుకుంది. ప్రముఖ మలయాళీ నేపధ్య, మాప్పిళప్పాట్టు గాయకుడు నిసార్ వయనాడ్ (44) దుబాయ్‌లోని మన్‌ఖూల్ ఆసుపత్రిలో చికిత్స పొందుతూ కన్నుమూశారు. అజ్మాన్‌లో జరగాల్సిన లైవ్ మ్యూజిక్ షోకి కొన్ని గంటల ముందే ఆయన మరణించడం యూఏఈలోని గల్ఫ్ మలయాళీ కమ్యూనిటీతో పాటు అభిమానులను తీవ్ర దిగ్భ్రాంతికి గురిచేసింది.

తీవ్ర జ్వరం, సెప్టిసీమియాతో అవయవాల వైఫల్యం
కేరళలోని వయనాడ్ జిల్లా కంబలక్కాడ్‌కు చెందిన నిసార్ వయనాడ్ అసలు పేరు నిస్సార్ అరోత్ ఇబ్రహీం. వివిధ సంగీత కార్యక్రమాల కోసం దుబాయ్‌కి వచ్చిన ఆయన గత కొన్ని రోజులుగా తీవ్ర జ్వరంతో బాధపడుతున్నారు. శనివారం మధ్యాహ్నం ఆరోగ్య పరిస్థితి విషమించడంతో ఆసుపత్రికి తరలించారు. ఇన్ఫెక్షన్ తీవ్రమై శరీరంలో సెప్టిసీమియా (Septicemia), యాసిడోసిస్ (Acidosis) వ్యాపించి, అవయవాలు విఫలమవ్వడంతో (Multi-organ Failure) చికిత్స పొందుతూ ప్రాణాలు కోల్పోయారు.