రాస్ అల్ ఖైమా: పీపుల్ ఆఫ్ డిటర్మినేషన్, సీనియర్ సిటిజన్ల కోసం ప్రత్యేకంగా కేటాయించిన ట్యాక్సీల సంఖ్యను రాస్ అల్ ఖైమా ట్రాన్స్‌పోర్ట్ అథారిటీ (RAKTA) రెండింటి నుంచి నాలుగుకు పెంచింది. దీంతో ఎమిరేట్‌లో ప్రత్యేక రవాణా సేవలు మరింత విస్తరించనున్నాయి.

కొత్తగా అందుబాటులోకి వచ్చిన ట్యాక్సీల్లో వీల్‌చైర్ వినియోగదారులు సులభంగా వాహనంలోకి ఎక్కడానికి, దిగేందుకు వీల్‌చైర్ లిఫ్టులు ఏర్పాటు చేశారు. ప్రయాణ సమయంలో వీల్‌చైర్ కదలకుండా ఉండేందుకు ప్రత్యేక వీల్‌చైర్ రిస్ట్రెయింట్ వ్యవస్థలు కూడా ఉన్నాయి. భద్రతను మరింత మెరుగుపరిచేందుకు, ప్రయాణాలను పర్యవేక్షించేందుకు స్మార్ట్ కెమెరాలను ఏర్పాటు చేశారు.

పీపుల్ ఆఫ్ డిటర్మినేషన్, సీనియర్ సిటిజన్లకు మరింత సురక్షితమైన, సౌకర్యవంతమైన, అందుబాటులో ఉండే రవాణా సదుపాయాలను అందించడంలో భాగంగా ఈ విస్తరణ చేపట్టినట్లు RAKTA తెలిపింది.

ప్రత్యేక ట్యాక్సీ డ్రైవర్లకు పీపుల్ ఆఫ్ డిటర్మినేషన్‌తో వ్యవహరించే విధానం, వారి అవసరాలను అర్థం చేసుకుని తగిన సహాయం అందించే అంశాలపై ప్రత్యేక శిక్షణ ఇస్తున్నారు.

RAKTA ట్రాన్స్‌పోర్ట్ లైసెన్సింగ్ అండ్ కంట్రోల్ డిపార్ట్‌మెంట్ డైరెక్టర్ మహ్మద్ హాషెమ్ ఇస్మాయిల్ మాట్లాడుతూ, ట్యాక్సీల సంఖ్యను పెంచడం ద్వారా ప్రత్యేక రవాణా సేవలు మరింత విస్తరించడంతో పాటు సురక్షితమైన, నమ్మకమైన ప్రయాణ అనుభవాన్ని అందించేందుకు వీలవుతుందని తెలిపారు.

పబ్లిక్ బస్సుల్లోనూ ప్రత్యేక సదుపాయాలు

రాస్ అల్ ఖైమా ప్రజా రవాణా వ్యవస్థలో కూడా పీపుల్ ఆఫ్ డిటర్మినేషన్‌కు ప్రత్యేక సదుపాయాలు కల్పించారు. ఎమిరేట్‌లోని అన్ని పబ్లిక్ బస్సులు వీల్‌చైర్ వినియోగదారులతో పాటు పీపుల్ ఆఫ్ డిటర్మినేషన్‌ను అనుమతించేలా రూపొందించారు.

సాకర్ గోల్డ్ కార్డ్ ద్వారా పీపుల్ ఆఫ్ డిటర్మినేషన్ అంతర్గత పబ్లిక్ బస్సుల్లో ఉచితంగా ప్రయాణించవచ్చు. సీనియర్ సిటిజన్లకు అంతర్గత పబ్లిక్ బస్సు సేవలపై 50 శాతం రాయితీ అందిస్తున్నారు.

ప్రత్యేక ట్యాక్సీ సేవను వినియోగించాలనుకునే వారు RAKTA కాంటాక్ట్ సెంటర్‌కు 8001700 టోల్‌ఫ్రీ నంబర్‌కు కాల్ చేసి వాహనాన్ని బుక్ చేసుకోవచ్చు.

ఈ చర్యల ద్వారా రాస్ అల్ ఖైమాలో అందరికీ సమానంగా, సురక్షితంగా, సౌకర్యవంతంగా ప్రజా రవాణా సేవలను అందించడంపై RAKTA దృష్టి సారిస్తోంది.