దుబాయ్‌లోని ప్రముఖ ప్రదేశాల్లో పాట చిత్రీకరణ.. తెలంగాణ సంప్రదాయానికి ఆధునిక నగర అందాల అద్దం

దుబాయ్: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వైభవాన్ని అంతర్జాతీయ వేదికపై చాటిచెప్పే లక్ష్యంతో ‘ది స్పార్క్ మీడియా’ ఆధ్వర్యంలో దుబాయ్‌లో తొలిసారిగా ప్రత్యేక బతుకమ్మ గీతాన్ని రూపొందించారు. గత నాలుగేళ్లుగా యూఏఈలో ఘనంగా బతుకమ్మ వేడుకలను నిర్వహిస్తున్న సంస్థ.. ఐదో సంవత్సరంలోకి అడుగుపెడుతున్న సందర్భంగా ఈ ప్రత్యేక గీతాన్ని రూపొందించడం విశేషం. విదేశీ గడ్డపై తెలుగు సంస్కృతి, సంప్రదాయాలను మరింత విస్తృతంగా పరిచయం చేయాలనే ఉద్దేశంతో ఈ ప్రయత్నానికి శ్రీకారం చుట్టారు.

దుబాయ్‌లోని ప్రసిద్ధ పర్యాటక ప్రదేశాలైన బుర్జ్ ఖలీఫా, దుబాయ్ ఫ్రేమ్, మ్యూజియం ఆఫ్ ది ఫ్యూచర్‌తో పాటు ఎడారి ఇసుక తిన్నెల అందాల నడుమ ఈ పాటను చిత్రీకరించారు. ఆధునిక దుబాయ్ నగర వైభవం, తెలంగాణ సంప్రదాయ బతుకమ్మ పండుగ అందాలను ఒకే తెరపై ఆవిష్కరించేలా గీతాన్ని రూపొందించారు. పుట్టిన గడ్డకు వేల కిలోమీటర్ల దూరంలో నివసిస్తున్నప్పటికీ.. తమ మూలాలు, సంస్కృతిపై తెలుగు ప్రజలకు ఉన్న ప్రేమను ఈ పాట ప్రతిబింబిస్తుందని నిర్వాహకులు తెలిపారు.

ది స్పార్క్ మీడియా ఆధ్వర్యంలో రూపొందిన ఈ ప్రతిష్టాత్మక గీతానికి ప్రముఖ డీఓపీ కమ్లీ పటేల్, టెక్నికల్ అడ్వైజర్ జలంధర్ సాంకేతిక సహకారం అందించారు. ప్రొడక్షన్ పార్ట్‌నర్‌గా ది లెమన్ స్టూడియో, ట్రావెల్ పార్ట్‌నర్‌గా లావణ్య టూర్స్, ట్రాన్స్‌పోర్ట్ పార్ట్‌నర్‌గా లగ్జరీ హబ్ వ్యవహరించాయి. ఈ కార్యక్రమానికి ప్రత్యేక సహకారం అందించిన ఈటీసీఏ (ETCA) బృందానికి నిర్వాహకులు కృతజ్ఞతలు తెలిపారు.

తెలంగాణ, ఆంధ్ర కుటుంబాలకు ఒకే వేదిక

యూఏఈలో నివసిస్తున్న తెలంగాణ, ఆంధ్రప్రదేశ్‌కు చెందిన తెలుగు కుటుంబాలను ఒకే వేదికపైకి తీసుకురావడం ది స్పార్క్ మీడియా నిర్వహించే బతుకమ్మ వేడుకల ప్రత్యేకత. ముఖ్యంగా మహిళలు, కుటుంబాలకు ప్రాధాన్యమిస్తూ నిర్వహించే ఈ వేడుకల్లో తెలంగాణ ఆడపడుచులతో పాటు ఆంధ్ర ప్రాంతానికి చెందిన మహిళలు కూడా ఉత్సాహంగా పాల్గొంటున్నారు. బతుకమ్మ చుట్టూ చేరి పాటలు పాడుతూ, సంప్రదాయ నృత్యాలతో సంబరాలు చేసుకుంటూ తెలుగు సంస్కృతిని చాటిచెబుతున్నారు.

ప్రాంతాలు వేరైనా భాష, సంస్కృతి, సంప్రదాయాల పట్ల ఉన్న అభిమానం తెలుగు ప్రజలను ఒక్కటిగా నిలుపుతోందని నిర్వాహకులు పేర్కొన్నారు. విదేశాల్లో నివసిస్తున్న తెలుగు కుటుంబాల మధ్య అనుబంధాలను బలోపేతం చేయడంతో పాటు, భావితరాలకు తమ సంస్కృతి గొప్పతనాన్ని పరిచయం చేయడమే ఈ వేడుకల ప్రధాన ఉద్దేశమని తెలిపారు.

ఐదేళ్ల ప్రయాణంలో ప్రత్యేక మైలురాయి

బతుకమ్మ కేవలం పూల పండుగ మాత్రమే కాదని, మహిళల ఆనందానికి, కుటుంబాల కలయికకు, తెలంగాణ పల్లె సంస్కృతికి ప్రతీక అని నిర్వాహకులు పేర్కొన్నారు. నాలుగేళ్లుగా వేడుకల రూపంలో కొనసాగుతున్న ఈ ప్రయాణం.. ఐదో సంవత్సరంలో ప్రత్యేక బతుకమ్మ గీతం రూపంలో మరో మైలురాయిని చేరుకుందని తెలిపారు.

దుబాయ్ ఆకాశహర్మ్యాల మధ్య, ఎడారి అందాల నడుమ బతుకమ్మ పండుగను ఆవిష్కరించడం ద్వారా తెలుగు సంస్కృతి వైభవాన్ని ప్రపంచానికి పరిచయం చేసే ప్రయత్నం చేశామని పేర్కొన్నారు. దేశాలు మారినా, నివాస ప్రాంతాలు మారినా తమ మూలాలు, సంప్రదాయాలపై ప్రేమ ఎప్పటికీ మారదనే సందేశాన్ని ఈ ప్రత్యేక గీతం అందిస్తుందని నిర్వాహకులు వెల్లడించారు.