ఆన్‌లైన్ మోసాల పట్ల అప్రమత్తంగా ఉండాలని సూచన.. వ్యక్తిగత, బ్యాంకింగ్ వివరాలు ఇతరులతో పంచుకోవద్దని హెచ్చరిక
దుబాయ్‌: ఆన్‌లైన్ మోసాలు, సైబర్‌ నేరాలపై కార్మికుల్లో అవగాహన కల్పించేందుకు దుబాయ్ పోలీసులు ప్రత్యేక కార్యక్రమాన్ని నిర్వహించారు. అల్‌ కూజ్ లో 478 మంది కార్మికులకు సైబర్‌ భద్రతపై దుబాయ్ పోలీసుల అవగాహనలోని అల్‌ నబూదా కాంప్లెక్స్‌లో నిర్వహించిన ఈ అవగాహన కార్యక్రమం ద్వారా మొత్తం 478 మంది కార్మికులకు సైబర్‌ భద్రతపై సూచనలు అందించారు.

ప్రతి ఏడాది అక్టోబర్‌లో నిర్వహించే సైబర్‌ సెక్యూరిటీ అవేర్‌నెస్‌ మంత్‌లో భాగంగా దుబాయ్ పోలీసుల పాజిటివ్ స్పిరిట్ కౌన్సిల్ ఈ కార్యక్రమాన్ని చేపట్టింది. ఈ సిరీస్‌లో భాగంగా నిర్వహించిన తొలి అవగాహన కార్యక్రమానికి జనరల్ డిపార్ట్‌మెంట్ ఆఫ్ పోలీస్ స్టేషన్స్‌లో భాగమైన బర్‌ దుబాయ్ పోలీస్ స్టేషన్‌తో పాటు ఇతర వ్యూహాత్మక భాగస్వామ్య సంస్థలు సహకరించాయి.

ఆన్‌లైన్ మోసాల పట్ల అప్రమత్తత అవసరం
సైబర్ నేరగాళ్లు ఉపయోగించే మోసపూరిత పద్ధతులు, అనుమానాస్పద లింకులు, నకిలీ సందేశాలు, మోసపూరిత ఫోన్ కాల్స్‌ను ఎలా గుర్తించాలో కార్మికులకు వివరించారు. వ్యక్తిగత సమాచారాన్ని సేకరించడం, బ్యాంకు ఖాతాల్లోకి అక్రమంగా ప్రవేశించడం వంటి నేరాలకు సైబర్ నేరగాళ్లు అనుసరించే విధానాలపై అవగాహన కల్పించారు.
తమ వ్యక్తిగత వివరాలు, పాస్‌వర్డ్‌లు, బ్యాంకింగ్ సమాచారాన్ని ఇతరులతో పంచుకోవద్దని సూచించారు. ఫోన్‌కు లేదా ఆన్‌లైన్‌లో అనూహ్యంగా వచ్చే సందేశాలు, లింకులు, ధ్రువీకరణ కోడ్‌ల విషయంలో అప్రమత్తంగా ఉండాలని హెచ్చరించారు. అనుమానాస్పద ఆన్‌లైన్ కార్యకలాపాలు ఎదురైనప్పుడు దుబాయ్ పోలీసుల అధికారిక మార్గాల ద్వారా ఫిర్యాదు చేయాలని సూచించారు.

సైబర్ భద్రత అందరి బాధ్యత
దుబాయ్ పోలీసుల పాజిటివ్ స్పిరిట్ కౌన్సిల్ చైర్‌పర్సన్ ఫాతిమా అహ్మద్ బోహ్జైర్ మాట్లాడుతూ, సమాజంలోని వివిధ వర్గాలకు, ముఖ్యంగా కార్మికులకు నేరుగా చేరువై భద్రతపై అవగాహన కల్పించడం ఈ కార్యక్రమం ప్రధాన ఉద్దేశమని తెలిపారు.
సైబర్‌ సెక్యూరిటీ అవేర్‌నెస్‌ మంత్ సందర్భంగా తొలి అవగాహన కార్యక్రమాన్ని ప్రారంభించడం ద్వారా మారుతున్న భద్రతా సవాళ్లను ఎదుర్కోవడంతో పాటు కార్మికుల్లో డిజిటల్ భద్రతను బలోపేతం చేయాలనే తమ నిబద్ధతను చాటుతున్నామని పేర్కొన్నారు.
సైబర్ భద్రత అనేది అందరి బాధ్యత అని ఆమె స్పష్టం చేశారు. ఆన్‌లైన్ మోసాల నుంచి ప్రజలను రక్షించాలంటే అవగాహన, సరైన సమాచారం, సురక్షితమైన డిజిటల్ పద్ధతులను గుర్తించే సామర్థ్యం ఎంతో అవసరమని వివరించారు.

కొనసాగనున్న అవగాహన కార్యక్రమాలు
పాజిటివ్ స్పిరిట్ కౌన్సిల్ ఆధ్వర్యంలో దుబాయ్ పోలీసుల వివిధ విభాగాలు, పోలీస్ స్టేషన్లు, వ్యూహాత్మక భాగస్వామ్య సంస్థల సహకారంతో మరిన్ని అవగాహన కార్యక్రమాలను నిర్వహించనున్నట్లు బోహ్జైర్ తెలిపారు.

సమాజంలో భద్రతను పెంపొందించడం, ప్రజల జీవన ప్రమాణాలను మెరుగుపరచడం, సురక్షితమైన వాతావరణాన్ని ప్రోత్సహించడం ఈ కార్యక్రమాల లక్ష్యమని పేర్కొన్నారు.
ఈ కార్యక్రమానికి అల్‌ ఖోజ్ పోలీస్ పోస్ట్ డైరెక్టర్ మేజర్ ఫైసల్ అహ్మద్ అల్‌ సాయెగ్‌తో పాటు వివిధ సంస్థల ప్రతినిధులు, వ్యూహాత్మక భాగస్వాములు హాజరయ్యారు.