కువైట్: నిర్లక్ష్యంగా వాహనం నడుపుతూ ప్రభుత్వ ఆస్తులకు నష్టం కలిగించిన డ్రైవర్‌ను కువైట్ జనరల్ ట్రాఫిక్ డిపార్ట్‌మెంట్ అధికారులు అరెస్ట్ చేశారు. సాద్ అల్-అబ్దుల్లా ప్రాంతంలో ఈ ఘటన చోటుచేసుకుంది. కువైట్ అంతర్గత వ్యవహారాల మంత్రిత్వ శాఖ తెలిపిన వివరాల ప్రకారం.. ట్రాఫిక్ ఉల్లంఘనలకు సంబంధించిన ఫిర్యాదుల కోసం కేటాయించిన వాట్సాప్ నంబర్‌కు ఓ ఫిర్యాదు అందింది. ఘటనకు సంబంధించిన వీడియోను కూడా ఫిర్యాదుదారులు పంపించారు.

దీంతో సెక్యూరిటీ కంట్రోల్ డిపార్ట్‌మెంట్‌కు చెందిన పెట్రోలింగ్ బృందం వెంటనే ఘటనాస్థలికి చేరుకుంది. నిర్లక్ష్యంగా డ్రైవింగ్ చేసిన వ్యక్తిని అదుపులోకి తీసుకుని, ఘటనకు సమీపంలోనే వాహనాన్ని స్వాధీనం చేసుకున్నారు. అధికారులు నిర్వహించిన తనిఖీల్లో.. డ్రైవర్ ప్రమాదకర రీతిలో వాహనాన్ని నడుపుతూ ప్రభుత్వ ఆస్తులకు నష్టం కలిగించినట్లు నిర్ధారణ అయిందని మంత్రిత్వ శాఖ వెల్లడించింది.నిందితుడిపై చట్టపరమైన చర్యలు తీసుకుని సెంట్రల్ జైలుకు తరలించారు. వాహనాన్ని కూడా అధికారులు సీజ్ చేశారు.

ట్రాఫిక్ ఉల్లంఘనలు ఫిర్యాదు చేయండి

ట్రాఫిక్ నిబంధనలను ఉల్లంఘించే వారిపై చర్యలు తీసుకునేందుకు ప్రజలు సహకరించాలని కువైట్ అంతర్గత వ్యవహారాల మంత్రిత్వ శాఖ కోరింది. రోడ్లపై నిర్లక్ష్యపు డ్రైవింగ్ లేదా ఇతర ట్రాఫిక్ ఉల్లంఘనలు కనిపిస్తే, వాటికి సంబంధించిన వీడియోలను వాట్సాప్ నంబర్ 99324092 కు పంపించి ఫిర్యాదు చేయవచ్చని తెలిపింది. ప్రజల సహకారంతో ఉల్లంఘనలకు పాల్పడిన వారిని త్వరగా గుర్తించి చర్యలు తీసుకోవడం సాధ్యమవుతుందని అధికారులు పేర్కొన్నారు.