దోహా: ఖతార్‌లో అక్రమంగా వీసాల విక్రయం, ప్రవాసుల నివాస నిబంధనల ఉల్లంఘనలకు పాల్పడితే కఠిన చర్యలు తప్పవని ఆ దేశ అంతర్గత వ్యవహారాల మంత్రిత్వ శాఖ (MoI) హెచ్చరించింది. అక్రమ వీసా వ్యాపారానికి పాల్పడిన వారికి గరిష్ఠంగా మూడేళ్ల జైలు శిక్షతో పాటు, మొదటిసారి నేరం చేసిన వారికి QR50,000 వరకు జరిమానా విధించే అవకాశం ఉందని వెల్లడించింది. అదే ఉల్లంఘనను మళ్లీ చేస్తే జరిమానా QR100,000 వరకు పెరుగుతుందని స్పష్టం చేసింది. ప్రవాసుల ఎంట్రీ, ఎగ్జిట్, రెసిడెన్సీకి సంబంధించిన నిబంధనలను ఉల్లంఘించే వారిపై తీసుకునే చర్యల గురించి మంత్రిత్వ శాఖ ఆధ్వర్యంలోని సెర్చ్ అండ్ ఫాలో-అప్ విభాగం నిర్వహించిన వెబినార్‌లో అధికారులు వివరించారు.  

ఇతర సంస్థల్లో పనిచేయిస్తే చర్యలు

సెర్చ్ అండ్ ఫాలో-అప్ విభాగంలోని డిటెన్షన్ విభాగం అధిపతి మేజర్ సౌద్ హమద్ అల్ బురైదీ మాట్లాడుతూ.. తాము నియమించుకున్న కార్మికులను ఇతర సంస్థల్లో పనిచేయించేవారు, అలాగే తాము నియమించుకోని కార్మికులను ఉద్యోగాల్లో పెట్టుకునే యజమానులు చట్టపరమైన చర్యలు ఎదుర్కోవాల్సి ఉంటుందని తెలిపారు. ఇలాంటి ఉల్లంఘనలకు పాల్పడితే గరిష్ఠంగా మూడేళ్ల జైలు శిక్ష, మొదటిసారి QR50,000 వరకు జరిమానా విధించవచ్చని పేర్కొన్నారు. పునరావృత ఉల్లంఘనలకు జరిమానా QR100,000 వరకు పెరగవచ్చని వివరించారు.

14 రోజుల్లో సమాచారం ఇవ్వకపోయినా జరిమానా

నిర్దిష్ట పరిస్థితుల్లో సంబంధిత అధికారులకు నిర్ణీత 14 రోజుల గడువులో సమాచారం అందించడంలో విఫలమయ్యే యజమానులకు QR50,000 వరకు జరిమానా విధించే అవకాశం ఉందని అధికారులు తెలిపారు. అలాగే రెసిడెన్సీ పర్మిట్ జారీ లేదా పునరుద్ధరణ ప్రక్రియను గడువులోగా పూర్తి చేయాలి. పర్మిట్ గడువు ముగిసిన తేదీ నుంచి గరిష్ఠంగా 90 రోజుల్లోగా ఈ ప్రక్రియను పూర్తి చేయాల్సి ఉంటుంది. ఈ నిబంధనను ఉల్లంఘిస్తే QR10,000 వరకు జరిమానా విధించవచ్చని వెల్లడించారు.

వీసా గడువు దాటిన వారిపైనా నిఘా

ఉద్యోగాలు వదిలి వెళ్లిన కార్మికులకు సంబంధించిన ఫిర్యాదులు, వీసా నిబంధనల ఉల్లంఘనలకు సంబంధించిన కేసులను కూడా ఈ విభాగం పరిశీలిస్తుంది. చట్టపరమైన ఉల్లంఘనలకు సంబంధించి స్వచ్ఛందంగా అధికారుల ఎదుట లొంగిపోయి దేశం విడిచి వెళ్లాలనుకునే వ్యక్తుల వ్యవహారాలను కూడా పరిష్కరిస్తుంది. ప్రవేశ వీసా గడువు ముగిసినా దేశంలోనే ఉండిపోయినవారు, రెసిడెన్సీ పర్మిట్‌ను సకాలంలో పునరుద్ధరించుకోని ప్రవాసులపై నిఘా కొనసాగిస్తామని అధికారులు తెలిపారు.  

యజమానులకు కీలక సూచనలు

ప్రవాసులను ఉద్యోగాల్లో నియమించుకునే యజమానులు కింది నిబంధనలను తప్పనిసరిగా పాటించాలని మేజర్ అల్ బురైదీ సూచించారు.

- ఉద్యోగ ఒప్పందాలను పత్రబద్ధం చేయాలి.

- కార్మికులకు తగిన వసతి సౌకర్యాలు కల్పించాలి.

- రెసిడెన్సీ పర్మిట్ జారీ, పునరుద్ధరణ ప్రక్రియలను నిర్ణీత గడువులోగా పూర్తి చేయాలి.

- ప్రవాస కార్మికుల నియామకానికి సంబంధించిన చట్టాలు, నిబంధనలను పాటించాలి.

ఖతార్‌లో ఉద్యోగాలు చేస్తున్న ప్రవాసులు, వారిని నియమించుకునే సంస్థలు వీసా, నివాస అనుమతి నిబంధనల విషయంలో అప్రమత్తంగా ఉండాలని అధికారులు సూచించారు.