చెన్నై: దక్షిణాది సినీ పరిశ్రమలో మరో విషాదం చోటుచేసుకుంది. కోట్లాది మంది సంగీత ప్రియుల హృదయాల్లో ‘తేనిసై తెండ్రల్’ గా చిరస్థాయిగా నిలిచిపోయిన ప్రముఖ సీనియర్ సంగీత దర్శకుడు, గాయకుడు దేవా (75) శనివారం చెన్నైలో కన్నుమూశారు. శనివారం ఉదయం 8:30 గంటల ప్రాంతంలో అస్వస్థతకు గురికావడంతో ఆయనను సూర్య ఆసుపత్రికి తరలించగా, చికిత్స పొందుతూ తుదిశ్వాస విడిచారని కుటంబ స‌భ్యులు వెల్ల‌డించారు.

నాలుగు దశాబ్దాల సంగీత ప్రస్థానం
తమిళ సినిమా రంగంలో తనకంటూ ప్రత్యేక గుర్తింపు తెచ్చుకున్న దేవా, మూడు దశాబ్దాలకు పైగా సాగిన తన సుదీర్ఘ కెరీర్‌లో తమిళ, తెలుగు, కన్నడ, మలయాళ భాషల్లో వందలాది చిత్రాలకు సంగీతం అందించారు. 1980ల చివర్లో, 1990ల ప్రారంభంలో ప్రముఖ సంగీత దర్శకుడిగా ఎదిగిన ఆయన, అనేక మంది ప్రముఖ నటులు, దర్శకులతో కలిసి పని చేసి అద్భుతమైన ఆల్బమ్‌లను అందించారు.

‘గానా’ సంస్కృతికి పెద్దపీట                                                                                                   చెన్నైకి చెందిన ప్రసిద్ధ ‘గానా’ (Gaana) సంగీతాన్ని మెయిన్‌స్ట్రీమ్ సినిమాలోకి తీసుకువచ్చిన ఘనత దేవాకే దక్కుతుంది. కేవలం శక్తివంతమైన ఫోక్ బీట్స్, మాస్ పాటలే కాకుండా.. ఎన్నో మధురమైన రొమాంటిక్ మెలోడీలు, భక్తి గీతాలను కంపోజ్ చేసి తన సంగీత బహుముఖ ప్రజ్ఞను చాటుకున్నారు. ఎవర్ గ్రీన్ హిట్స్, సూపర్ స్టార్ రజనీకాంత్, కమల్ హాసన్, విజయ్, అజిత్ కుమార్ వంటి దిగ్గజ నటుల చిత్రాలకు దేవా అందించిన సంగీతం ఎప్పటికీ నిలిచిపోతుంది. ఆయన కెరీర్‌లో మైల్‌స్టోన్‌గా నిలిచిన ‘అన్నామలై’, ‘బాషా’, ‘ఆసై’, ‘కాదల్ కోట్టై’, ‘నేరుక్కు నేర్’, ‘నినైతేన్ వందై’, ‘ప్రియముడన్’, ‘వాలి’, ‘ఖుషి’ వంటి కల్ట్ బ్లాక్‌బస్టర్ చిత్రాలకు ఆయన ప్రాణం పోశారు.

తెలుగు ప్రేక్షకులను అలరించిన మాస్టర్, తొలిప్రేమ                                                        తమిళంలోనే కాకుండా తెలుగులోనూ దేవా అనేక ప్రాచుర్యం పొందిన పాటలను అందించారు. మెగాస్టార్ చిరంజీవి నటించిన ‘మాస్టర్’, పవర్ స్టార్ పవన్ కళ్యాణ్ నటించిన కల్ట్ క్లాసిక్ ‘తొలిప్రేమ’ చిత్రాలకు ఆయన అందించిన సంగీతం తెలుగు సంగీత ప్రియులను ఎంతగానో ఆకట్టుకుంది. ఈ చిత్రాల్లోని పాటలు దశాబ్దాలు గడిచినా నేటికీ శ్రోతల మనసుల్లో నిలిచిపోతూనే ఉన్నాయి.