మస్కట్‌: ఒమన్‌లో రానున్న నెలల్లో వాతావరణ పరిస్థితుల్లో మార్పులు చోటుచేసుకునే అవకాశం ఉందని సివిల్ ఏవియేషన్ అథారిటీ పరిధిలోని నేషనల్ మల్టీ-హజార్డ్ ఎర్లీ వార్నింగ్ సెంటర్ వెల్లడించింది. ఎల్‌నినో ప్రభావంతో పాటు ఇతర ప్రాంతీయ, ప్రపంచ వాతావరణ పరిస్థితుల కారణంగా ఉష్ణోగ్రతలు, వర్షపాతంలో మార్పులు సంభవించవచ్చని అంచనా వేసింది. 2026 సెప్టెంబర్‌ నుంచి 2027 మే వరకు ఎల్‌నినో, ఒమన్ వాతావరణంపై దాని ప్రభావాలపై కేంద్రం కాలానుగుణ అంచనా నివేదికను విడుదల చేసింది. నవంబర్‌, డిసెంబర్‌ 2026లో ఎల్‌నినో ప్రభావం గరిష్ఠ స్థాయికి చేరుకునే అవకాశం ఉందని నివేదిక పేర్కొంది.

ఉత్తర ఒమన్‌లో అధిక వర్షపాతం

వాతావరణ కేంద్రం అంచనాల ప్రకారం.. 2026 అక్టోబర్‌, నవంబర్‌ నెలల్లో ఉత్తర ఒమన్‌లో సాధారణం కంటే ఎక్కువ వర్షపాతం నమోదయ్యే అవకాశం ఉంది. డిసెంబర్‌లో చాలా ప్రాంతాల్లో వర్షపాతం సాధారణ స్థాయిలో ఉండవచ్చని, అయితే ఉత్తర ప్రాంతాల్లో మాత్రం అధిక వర్షాలు కురిసే అవకాశాలు కొనసాగుతాయని తెలిపింది. అరేబియా సముద్ర తీర ప్రాంతాల్లో అక్టోబర్‌లో సాధారణం కంటే తక్కువ వర్షపాతం నమోదయ్యే అవకాశం ఉందని అంచనా వేసింది.

సాధారణం కంటే అధిక ఉష్ణోగ్రతలు

అక్టోబర్‌, నవంబర్‌, డిసెంబర్‌ నెలల్లో ఒమన్‌ అంతటా సాధారణం కంటే అధిక ఉష్ణోగ్రతలు నమోదయ్యే సూచనలు ఉన్నాయని నివేదిక తెలిపింది. అయితే ఈ మార్పులకు ఎల్‌నినో ఒక్కటే కారణం కాదని, అనేక ప్రాంతీయ, ప్రపంచ వాతావరణ అంశాల పరస్పర ప్రభావం కూడా ఉంటుందని స్పష్టం చేసింది.

ఎల్‌నినో సమయంలో వర్షపాతం పెరుగుదల

1980 నుంచి 2025 వరకు నమోదైన వాతావరణ గణాంకాలపై నిర్వహించిన విశ్లేషణలో ఎల్‌నినో ప్రభావం ఉన్న కాలాల్లో ఒమన్‌లో వర్షపాతం పెరిగినట్లు గుర్తించారు.

- సెప్టెంబర్‌–నవంబర్‌: సాధారణ సగటు కంటే 20 శాతం అధికం.

- డిసెంబర్‌–ఫిబ్రవరి: సాధారణ సగటు కంటే 31 శాతం అధికం.

- మార్చి–మే: సాధారణ సగటు కంటే 54 శాతం అధికం.

ఉత్తర ఒమన్‌లో ఈ సంబంధం మరింత స్పష్టంగా కనిపించిందని నివేదిక వివరించింది. అయితే ఇవి గత సంవత్సరాల గణాంకాల ఆధారంగా వచ్చిన అంచనాలేనని, రానున్న సీజన్‌లో ఇదే స్థాయిలో వర్షపాతం నమోదవుతుందని నిర్ధారించలేమని పేర్కొంది.

వరదలు, వాడీల్లో నీటి ప్రవాహాలపై హెచ్చరిక

భారీ వర్షాలు కురిసే ప్రాంతాల్లో వాడీల్లో అకస్మాత్తుగా నీటి ప్రవాహాలు పెరగడం, లోతట్టు ప్రాంతాల్లో నీరు నిలిచిపోవడం వంటి పరిస్థితులు తలెత్తవచ్చని వాతావరణ కేంద్రం హెచ్చరించింది. బలమైన గాలులు, సముద్రంలో ఎత్తైన అలలు, వడగళ్ల వాన పడే అవకాశాలు కూడా ఉన్నాయని తెలిపింది. ప్రజలు ముఖ్యంగా వర్ష ప్రభావిత ప్రాంతాల్లో అప్రమత్తంగా ఉండాలని, అధికారుల సూచనలు పాటించాలని సూచించింది.

అరేబియా సముద్రంలో తుపానులకు అవకాశం

అక్టోబర్‌ నుంచి డిసెంబర్‌ వరకు అరేబియా సముద్రంలో ఉష్ణమండల వాతావరణ వ్యవస్థలు ఏర్పడే అవకాశాలు కొనసాగుతాయని నివేదిక పేర్కొంది. అయితే వాటి తీవ్రత, కార్యకలాపాలు అప్పటి వాతావరణ పరిస్థితులపై ఆధారపడి ఉంటాయని వివరించింది. 1997–1998, 2015–2016 సంవత్సరాల్లో ఎల్‌నినో ప్రభావం ఉన్న సమయంలో ఒమన్‌లో భారీ వర్షాలు నమోదైన చారిత్రక ఉదాహరణలను నివేదిక ప్రస్తావించింది.    

వాతావరణ పరిస్థితులపై నిరంతర పర్యవేక్షణ

ఎల్‌నినోతో పాటు సంబంధిత వాతావరణ మార్పులను నిరంతరం పర్యవేక్షిస్తున్నామని నేషనల్ మల్టీ-హజార్డ్ ఎర్లీ వార్నింగ్ సెంటర్ తెలిపింది. సంభవించే ప్రమాదాలను ముందుగానే అంచనా వేసి, అత్యవసర పరిస్థితులను ఎదుర్కొనేందుకు సంబంధిత జాతీయ విపత్తు నిర్వహణ విభాగాలతో సమన్వయం చేస్తున్నట్లు వెల్లడించింది.

ఎల్‌నినో అంటే ఏమిటి?

ఎల్‌నినో అనేది ఉష్ణమండల పసిఫిక్ మహాసముద్రంలో సముద్ర ఉపరితల ఉష్ణోగ్రతలు సాధారణం కంటే పెరగడం, గాలులు మరియు వాతావరణ పీడన వ్యవస్థల్లో మార్పులు చోటుచేసుకోవడం వల్ల ఏర్పడే సహజ వాతావరణ మార్పులు. దీని ప్రభావం ప్రాంతాన్ని బట్టి మారుతుంది. కొన్ని ప్రాంతాల్లో అధిక వర్షాలు, మరికొన్ని ప్రాంతాల్లో తక్కువ వర్షపాతం లేదా అధిక ఉష్ణోగ్రతలు నమోదయ్యే అవకాశం ఉంటుంది.