మనామా: బహ్రెయిన్‌లో డెలివరీ బైక్‌లకు కొత్త లైసెన్సుల జారీని తాత్కాలికంగా నిలిపివేయాలన్న ప్రతిపాదనపై పార్లమెంట్ తదుపరి సమావేశంలో ఓటింగ్ నిర్వహించనుంది. డెలివరీ బైక్‌లతో జరుగుతున్న రోడ్డు ప్రమాదాలు, రహదారులపై పెరుగుతున్న రద్దీ నేపథ్యంలో ఈ ప్రతిపాదన తెరపైకి వచ్చింది. ఎంపీ మహమ్మద్ జనాహి ప్రభుత్వానికి ఈ ప్రతిపాదన చేశారు. డెలివరీ రైడర్లకు కఠినమైన భద్రతా నిబంధనలు అమల్లోకి వచ్చే వరకు కొత్త లైసెన్సులు జారీ చేయకూడదని ఆయన కోరుతున్నారు.

2024లో ఏడుగురు రైడర్లు మృతి

మహమ్మద్ జనాహి వెల్లడించిన గణాంకాల ప్రకారం.. 2024లో రోడ్డు ప్రమాదాల్లో ఏడుగురు డెలివరీ రైడర్లు ప్రాణాలు కోల్పోయారు. 2023లో ఈ సంఖ్య నలుగురుగా ఉంది. 2023లో మరణించిన నలుగురిలో ఇద్దరు ప్రమాదాలకు కారణమైనట్లు గుర్తించగా, మరో ఇద్దరు బాధితులుగా ఉన్నారని ఆయన తెలిపారు. డెలివరీ సేవలు వేగంగా విస్తరించడంతో తగిన శిక్షణ, భద్రతా పరికరాలు లేకుండానే అనేక మంది రైడర్లు ఈ రంగంలోకి వస్తున్నారని జనాహి ఆందోళన వ్యక్తం చేశారు. రహదారులపై డెలివరీ బైక్‌ల సంఖ్య పెరగడం ట్రాఫిక్ రద్దీకి, ప్రమాదాల ముప్పునకు కారణమవుతోందని పేర్కొన్నారు.

భద్రతా నిబంధనల కోసం తాత్కాలిక నిలిపివేత

కొత్త లైసెన్సుల జారీని తాత్కాలికంగా నిలిపివేస్తే, రైడర్ల శిక్షణ, రహదారి భద్రత, డెలివరీ సంస్థల కార్యకలాపాలపై తప్పనిసరి నిబంధనలు రూపొందించేందుకు ప్రభుత్వానికి సమయం లభిస్తుందని జనాహి అభిప్రాయపడ్డారు. దీనివల్ల ట్రాఫిక్ ఉల్లంఘనలను తగ్గించడంతో పాటు ప్రమాదకర డ్రైవింగ్‌ను నియంత్రించి, రహదారులపై రద్దీని తగ్గించవచ్చని పేర్కొన్నారు.

కొత్త నిబంధనల రూపకల్పనలో అధికారులు

ప్రస్తుతం రవాణా మంత్రిత్వ శాఖ అమలు చేస్తున్న భూ రవాణా నిబంధనల పరిధిలో డెలివరీ సేవలు లేవని పార్లమెంట్‌కు వివరించారు. అయితే, డెలివరీ సేవలను ఈ నిబంధనల పరిధిలోకి తీసుకొచ్చేందుకు రవాణా, టెలికమ్యూనికేషన్ల మంత్రిత్వ శాఖ.. పరిశ్రమలు, వాణిజ్య మంత్రిత్వ శాఖతో పాటు ట్రాఫిక్ విభాగంతో కలిసి పనిచేస్తోంది. ఈ మేరకు మంత్రిత్వ శాఖ స్థాయిలో కొత్త నిర్ణయ ముసాయిదాను సిద్ధం చేస్తున్నారు. అయితే, కొత్త నిబంధనలు ఎప్పటి నుంచి అమల్లోకి వస్తాయనే విషయంపై ఇంకా తేదీని ప్రకటించలేదు.

లైసెన్సుల బాధ్యత రవాణా మంత్రిత్వ శాఖదే

బహ్రెయిన్ 2014 ట్రాఫిక్ చట్టం ప్రకారం..  డెలివరీలకు ఉపయోగించే మోటార్‌బైక్‌లను ప్రజా రవాణా వాహనాలుగా పరిగణిస్తున్నట్లు జనరల్ డైరెక్టరేట్ ఆఫ్ ట్రాఫిక్ తెలిపింది. చట్టంలోని ఆర్టికల్స్ 17, 18 ప్రకారం, ఏ సేవలను ప్రజా రవాణాగా పరిగణించాలి, వాటికి ఎలాంటి నిబంధనలు, ఫీజులు వర్తించాలి, ఏ వాహనాలను వినియోగించవచ్చనే అంశాలను నిర్ణయించే అధికారం రవాణా మంత్రిత్వ శాఖకు ఉంది.

వాహనాలకు రహదారులపై తిరిగేందుకు అనుమతులు జారీ చేయడం, వాటి భద్రత, రహదారిపై నడిచే సామర్థ్యం, పర్యావరణ ప్రమాణాలను తనిఖీ చేయడం ట్రాఫిక్ విభాగం బాధ్యత అని అధికారులు వివరించారు. వాణిజ్య డెలివరీ సేవలకు సంబంధించిన లైసెన్సుల వ్యవహారం మాత్రం రవాణా మంత్రిత్వ శాఖ పరిధిలోకి వస్తుందని స్పష్టం చేశారు.

మరోవైపు, ట్రాఫిక్ నిబంధనలు ఉల్లంఘించే రైడర్లపై చర్యలు కొనసాగిస్తామని అంతర్గత వ్యవహారాల మంత్రిత్వ శాఖ తెలిపింది. డెలివరీ కార్మికులకు తనిఖీలు నిర్వహించడంతో పాటు రహదారి భద్రతపై అవగాహన కార్యక్రమాలు కూడా కొనసాగిస్తామని వెల్లడించింది.