యెమెన్‌లో హింసాకాండ మరోసారి పరాకాష్టకు చేరింది. దక్షిణ షాబ్వా ప్రావిన్స్‌లోని ఒక సైనిక శిబిరంపై ఇరాన్ మద్దతు గల హూతీ తిరుగుబాటుదారులు సోమవారం జరిపిన బాలిస్టిక్ క్షిపణి దాడిలో దాదాపు 53 మంది సైనికులు దుర్మరణం చెందారు. ఈ వేసవిలో అంతర్యుద్ధం మళ్లీ ఉధృతమైన తర్వాత జరిగిన అత్యంత ప్రాణాంతకమైన దాడులలో ఇది ఒకటిగా యెమెన్ సైనిక అధికారులు తెలిపారు. ఈ దుర్ఘటనలో మరో 200 మంది కొత్త రిక్రూట్లు తీవ్రంగా గాయపడ్డారు.

విచ్ఛిన్నమైన కాల్పుల విరమణ.. విస్తరిస్తున్న యుద్ధ రంగం

హూతీలకు, యెమెన్ సౌదీ మద్దతు ఉన్న ప్రభుత్వ బలగాలకు మధ్య జరుగుతున్న ఈ పోరాటం, ఈ ఏడాది ఫిబ్రవరిలో ప్రారంభమైన ఇరాన్ యుద్ధంలో మరో విస్తృత రంగాన్ని తలపిస్తోంది. ఈ తీవ్ర పరిణామాలు యెమెన్ అంతర్యుద్ధంలో చాలావరకు పోరాటాలను ఆపిన 2022 నాటి కాల్పుల విరమణ ఒప్పందాన్ని పూర్తిగా విచ్ఛిన్నం చేశాయి.

శిక్షణలో ఉన్న రిక్రూట్‌లపైనే లక్ష్యం: ప్రావిన్షియల్ ప్రభుత్వం

శిక్షణ తీసుకుంటున్న కొత్త రిక్రూట్‌లను లక్ష్యంగా చేసుకొని ఈ ద్రోహపూరిత దాడికి పాల్పడ్డారని, ఇది షాబ్వా ప్రావిన్స్ భద్రతపై జరిగిన తీవ్రమైన దురాక్రమణ అని షాబ్వా ప్రావిన్షియల్ ప్రభుత్వం ఆందోళన వ్యక్తం చేసింది. రెస్క్యూ, సహాయక చర్యలు కొనసాగుతుండటంతో మృతుల సంఖ్య మరింత పెరిగే అవకాశం ఉందని తెలిపింది.

ఈ దారుణ ఘటనపై యెమెన్ ప్రెసిడెన్షియల్ లీడర్‌షిప్ కౌన్సిల్ హెడ్ రషాద్ అల్-అలిమి తీవ్రంగా స్పందించారు. “తమ ఇరాన్-మద్దతుగల విధ్వంసక కుట్రలు భగ్నమైనప్పుడల్లా హూతీలు ఇలాంటి భయానక ఉగ్రవాద దాడికి పాల్పడటం వారి నైజాన్ని మళ్లీ రుజువు చేసింది” అని మండిపడ్డారు. ఈ దాడికి తామే కారణమని హూతీలు కూడా అంగీకరించారు.

సౌదీ అరేబియా పై తీవ్రమవుతున్న హూతీల దాడులు

అంతర్జాతీయంగా గుర్తింపు పొందిన యెమెన్ ప్రభుత్వానికి సౌదీ అరేబియా మద్దతు ఇస్తుండటంతో, హూతీలు సౌదీ లక్ష్యాలపై దాడులను క్రమంగా పెంచుతున్నారు. 2015లో తిరుగుబాటుదారులు రాజధాని సనా సహా ఉత్తర యెమెన్‌ను ఆక్రమించుకున్న తరుణంలో, తమ సరిహద్దులో ఇరాన్ అనుకూల శక్తి బలపడటాన్ని జీర్ణించుకోలేక సౌదీ నేతృత్వంలోని సున్నీ కూటమి ఈ యుద్ధంలో రంగప్రవేశం చేసింది.

ఇదిలా ఉండగా, ఆదివారం సౌదీ నేతృత్వంలోని బలగాలు జరిపిన వైమానిక దాడిలో ఐదుగురు పిల్లలు, ఇద్దరు మహిళలతో సహా తొమ్మిది మంది ప్రాణాలు కోల్పోయినట్లు హూతీల ఆధ్వర్యంలోని ఆరోగ్య మంత్రిత్వ శాఖ వెల్లడించింది.

ఐదేళ్లుగా అదుపులో యూఎస్ ఎంబసీ స్థానిక సిబ్బంది

మరోవైపు, యెమెన్‌లోని సనాలో మూతపడిన అమెరికా రాయబార కార్యాలయానికి చెందిన 20 మందికి పైగా స్థానిక సిబ్బందిని హూతీలు అదుపులోకి తీసుకొని సోమవారంతో సరిగ్గా ఐదు సంవత్సరాలు పూర్తయింది. 2015లో ఎంబసీ కార్యకలాపాలు నిలిచిపోయినప్పటికీ, భద్రత, బేసిక్ మెయింటెనెన్స్ పనులు చూస్తున్న ఈ స్థానిక సిబ్బందిని వెంటనే, ఎలాంటి షరతులు లేకుండా విడుదల చేయాలని అమెరికా విదేశాంగ శాఖ సోమవారం గట్టిగా డిమాండ్ చేసింది.