కేరళ: క్రికెట్ అభిమానులు ఎంతగానో ఎదురుచూస్తున్న టాటా ఉమెన్స్ ప్రీమియర్ లీగ్ (WPL) 2027 ప్లేయర్ల వేలం వేదిక, తేదీ ఖరారయ్యాయి. కేరళలోని కొచ్చి వేదికగా అక్టోబర్ 28న ఈ వేలం జరగనుంది. టోర్నీలోని ఐదు ఫ్రాంచైజీలు తమ జట్లను మరింత బలోపేతం చేసుకునేందుకు ఈ వేలంలో పోటీపడనున్నాయి. అందుబాటులో ఉన్న కేవలం 27 ఖాళీల (స్లాట్లు) కోసం మొత్తం 146 మంది ఆటగాళ్లు అదృష్టాన్ని పరీక్షించుకోనున్నారు.

146 మంది ఆటగాళ్లు.. 27 ఖాళీలు మాత్రమే!
డబ్ల్యూపీఎల్ విడుదల చేసిన అధికారిక ప్రకటన ప్రకారం.. వేలం పూల్‌లో ఉన్న 146 మంది ఆటగాళ్లలో 119 మంది భారతీయులు, 27 మంది విదేశీ ప్లేయర్లు ఉన్నారు.

భారత ఆటగాళ్లు: 119 మంది (22 మంది క్యాప్డ్, 97 మంది అన్‌క్యాప్డ్)

విదేశీ ఆటగాళ్లు: 27 మంది (14 మంది క్యాప్డ్, 13 మంది అన్‌క్యాప్డ్)

అసోసియేట్ దేశాలు: విదేశీ విభాగంలో ఆరుగురు ప్లేయర్లు అసోసియేట్ దేశాలకు ప్రాతినిధ్యం వహిస్తున్నారు.

ఫ్రాంచైజీల వద్ద ఉన్న 27 ఖాళీలలో 20 భారతీయ ఆటగాళ్లకు, 7 విదేశీ ఆటగాళ్లకు కేటాయించారు.

డబ్ల్యూపీఎల్ వేలం: తేదీ మరియు సమయం
వేదిక: కొచ్చి, కేరళ

తేదీ: అక్టోబర్ 28

సమయం: సాయంత్రం 5:30 గంటలకు వేలం ప్రారంభమవుతుంది.

భారీ బేస్ ప్రైజ్ విభాగంలో విదేశీ, భారత ప్లేయర్లు
ఈ వేలంలో అత్యధికంగా రూ. 50 లక్షల బేస్ ప్రైజ్ విభాగంలో ఇంగ్లాండ్ బ్యాటర్ సోఫియా డ్యాంక్లీ, ఆస్ట్రేలియా ఆల్‌రౌండర్ సోఫీ మోలినెక్స్ తమ పేర్లను నమోదు చేసుకున్నారు.

అలాగే రూ.40 లక్షల బేస్ ప్రైజ్ విభాగంలో భారత్ నుంచి జి. కమలిని, కిరణ్ నవ్‌గిరే ఉన్నారు.

ఆస్ట్రేలియా నుంచి హెథర్ గ్రాహం, జెస్ జోనాస్సెన్ ఉన్నారు.

మరో 30 మంది ఆటగాళ్లు రూ. 30 లక్షల బేస్ ప్రైజ్ విభాగంలో తమ పేర్లను నమోదు చేసుకున్నారు. పరిమితంగా ఉన్న స్లాట్లను దక్కించుకునేందుకు ఐదు ఫ్రాంచైజీల మధ్య హోరాహోరీ పోరు నెలకొనే అవకాశం ఉంది.