అమెరికా: అమెరికా వర్క్ వీసా నిబంధనల్లో ఇటీవల తీసుకువచ్చిన మార్పులపై ఆ దేశ విదేశాంగ మంత్రి మార్కో రూబియో స్పష్టత ఇచ్చారు. కొత్త నిబంధనలు భారత్‌ను లక్ష్యంగా చేసుకుని తీసుకున్నవి కాదని, ఇవి ప్రపంచవ్యాప్తంగా వర్తించే నిబంధనలని తెలిపారు. భారత్‌లో పర్యటించిన సందర్భంగా ఇచ్చిన ఒక ఇంటర్వ్యూలో ఆయన మాట్లాడుతూ, వీసా మార్పులపై వ్యక్తమవుతున్న ఆందోళనలను తగ్గించే ప్రయత్నం చేశారు. అమెరికా వలస విధానంలో ఉన్న లోపాలను సరిదిద్దడానికే ఈ మార్పులు చేశామని రూబియో స్పష్టం చేశారు. వర్క్ వీసా మరియు వ్యాపార వలస కార్యక్రమాలు తీవ్ర దుర్వినియోగానికి, మోసాలకు గురవుతున్నందున ఈ చర్యలు తప్పలేదన్నారు. భారతదేశం తమ ప్రజల ప్రయోజనాలకు ప్రాధాన్యం ఇచ్చినట్లే, ట్రంప్ ప్రభుత్వం కూడా అమెరికన్ కార్మికులు, జాతీయ ప్రయోజనాలకే ప్రథమ ప్రాధాన్యం ఇస్తుందని వ్యాఖ్యానించారు.

టెక్ దిగ్గజాలకు భారీ షాక్: ప్లాట్ ఫామ్స్ సర్టిఫికేషన్ సస్పెన్షన్
మరోవైపు, మైక్రోసాఫ్ట్, ఇన్ఫోసిస్, టిసిఎస్ (TCS), విప్రో, కాగ్నిజెంట్, హెచ్‌సీఎల్, క్యాప్‌జెమినీ, అడోబ్ వంటి ఎనిమిది ప్రముఖ టెక్ కంపెనీలకు అమెరికా ప్రభుత్వం షాక్ ఇచ్చింది. ఈ సంస్థల ‘శాశ్వత కార్మిక సర్టిఫికేషన్‌’ (PERM) ప్రాసెసింగ్‌ను అమెరికా కార్మిక శాఖ సస్పెండ్ చేసింది. హెచ్-1బీ (H-1B) వీసా దుర్వినియోగాన్ని అరికట్టేందుకే ఈ నిర్ణయం తీసుకున్నట్లు ఉపాధ్యక్షుడు జేడీ వాన్స్ తెలిపారు. దీనివల్ల ఈ కంపెనీల ద్వారా హెచ్-1బీ వీసాపై అమెరికా వెళ్లే ఉద్యోగులు గ్రీన్ కార్డ్ కోసం దరఖాస్తు చేసుకోవడం కష్టతరం కానుంది.