మస్కట్: మస్కట్‌లో 30వ అంతర్జాతీయ పుస్తక ప్రదర్శన 2027 మార్చి 24 నుంచి ఏప్రిల్ 3 వరకు నిర్వహించనున్నారు. ఈ మేరకు నిర్వాహకులు ఏర్పాట్లను ముమ్మరం చేస్తున్నారు. ప్రదర్శనలో సాంస్కృతిక కార్యక్రమాలను మరింత విస్తరించడంతో పాటు సృజనాత్మక పరిశ్రమలకు ప్రాధాన్యం ఇవ్వనున్నారు.

మస్కట్ అంతర్జాతీయ పుస్తక ప్రదర్శన ప్రధాన కమిటీ సమావేశం సమాచార శాఖ మంత్రి, కమిటీ ఛైర్మన్ డాక్టర్ అబ్దుల్లా బిన్ నాసర్ అల్ హరాసీ అధ్యక్షతన జరిగింది. ఈ సమావేశంలో తదుపరి ప్రదర్శనకు సంబంధించిన ప్రాథమిక ప్రణాళికలు, సాంస్కృతిక కార్యక్రమాలు, ప్రచురణ రంగానికి సంబంధించిన అంశాలపై చర్చించారు.

గౌరవ అతిథిగా అల్ వుస్తా గవర్నరేట్

30వ ఎడిషన్‌లో అల్ వుస్తా గవర్నరేట్‌ను గౌరవ అతిథిగా ఎంపిక చేశారు. ఈ ప్రాంత చారిత్రక, సాంస్కృతిక, ఆర్థిక ప్రాధాన్యంతో పాటు వారసత్వ సంపద, సహజ వనరులు, పెట్టుబడి అవకాశాలను ప్రదర్శనలో ప్రత్యేకంగా పరిచయం చేయనున్నారు.

సృజనాత్మక పరిశ్రమలకు ప్రాధాన్యం

ఈసారి పుస్తక ప్రదర్శనకు ‘సృజనాత్మక పరిశ్రమలు’ (Creative Industries) అనే ఇతివృత్తాన్ని ప్రతిపాదించారు. సృజనాత్మకత, నూతన ఆవిష్కరణలను ప్రోత్సహించడంతో పాటు సాంస్కృతిక, విజ్ఞాన ఆధారిత రంగాల అభివృద్ధి ద్వారా ఆర్థిక వృద్ధికి దోహదపడే అంశాలను ఈ ప్రదర్శనలో హైలైట్ చేయనున్నారు.

రచయితలు, మేధావులు, ప్రచురణకర్తలు, సాహిత్యాభిమానులకు కీలక వేదికగా నిలుస్తున్న మస్కట్ అంతర్జాతీయ పుస్తక ప్రదర్శనను మరింత విజయవంతంగా నిర్వహించేందుకు సంబంధిత విభాగాల మధ్య సమన్వయంతో ఏర్పాట్లు కొనసాగించాలని కమిటీ నిర్ణయించింది.