మనామా: బహ్రెయిన్‌లో మాదకద్రవ్యాల అక్రమ రవాణా, విక్రయాలపై అధికారులు ఉక్కుపాదం మోపుతున్నారు. ఇందులో భాగంగా మూడు వేర్వేరు కేసుల్లో మొత్తం ఆరుగురు ఆసియా దేశస్థులను అరెస్ట్‌ చేశారు. వారి నుంచి BD27,000కు పైగా విలువైన మాదకద్రవ్యాలు, సైకోట్రోపిక్‌ పదార్థాలను స్వాధీనం చేసుకున్నారు. బహ్రెయిన్‌ జనరల్‌ డైరెక్టరేట్‌ ఆఫ్‌ క్రిమినల్‌ ఇన్వెస్టిగేషన్‌ అండ్‌ ఫోరెన్సిక్‌ సైన్స్‌ పరిధిలోని యాంటీ నార్కోటిక్స్‌ డైరెక్టరేట్‌ ఈ ఆపరేషన్లు నిర్వహించింది.

మొదట అందిన సమాచారం ఆధారంగా అధికారులు దర్యాప్తు చేపట్టి నిందితులను గుర్తించారు. అనంతరం వారిని అరెస్ట్‌ చేశారు. ఈ సందర్భంగా మాదకద్రవ్యాలు, సైకోట్రోపిక్‌ పదార్థాలతో పాటు డ్రగ్స్‌ విక్రయాల ద్వారా వచ్చినట్లు అనుమానిస్తున్న నగదును కూడా స్వాధీనం చేసుకున్నారు. అవసరమైన చట్టపరమైన ప్రక్రియలను పూర్తి చేసిన అనంతరం మూడు కేసులను పబ్లిక్‌ ప్రాసిక్యూషన్‌కు అప్పగించారు. ఈ కేసులకు సంబంధించి తదుపరి చట్టపరమైన చర్యలు కొనసాగనున్నాయి.

మాదకద్రవ్యాల నిర్మూలనకు ప్రజలు సహకరించాలని బహ్రెయిన్‌ జనరల్‌ డైరెక్టరేట్‌ కోరింది. డ్రగ్స్‌కు సంబంధించిన సమాచారం తెలిస్తే హాట్‌లైన్‌: 996, ఈమెయిల్‌: [email protected] ద్వారా అధికారులకు తెలియజేయవచ్చని సూచించింది. సమాచారం అందించే వారి వివరాలను పూర్తి గోప్యతతో నిర్వహిస్తామని అధికారులు స్పష్టం చేశారు.