రియాద్‌: సౌదీ అరేబియాలో ప్రైవేటు రంగంలో పనిచేస్తున్న సౌదీ పౌరులకు సంబంధించి కనీస నెలవారీ వేతన పరిమితిని పెంచాలని మానవ వనరులు, సామాజిక అభివృద్ధి మంత్రిత్వ శాఖ నిర్ణయించింది. నితాఖత్‌ (Nitaqat) సౌదీకరణ కార్యక్రమం కింద ఉద్యోగులను పూర్తిస్థాయిలో లెక్కించేందుకు అవసరమైన కనీస వేతన పరిమితిని 2027 ఏప్రిల్‌ 25 నుంచి SR5,000కు, 2028 ఏప్రిల్‌ 25 నుంచి SR6,000కు పెంచనున్నారు. ఈ నిర్ణయాన్ని రెండు దశల్లో అమలు చేయనున్నట్లు మంత్రిత్వ శాఖ వెల్లడించింది.

ఈ నిర్ణయంపై మంత్రిత్వ శాఖ కీలక స్పష్టత ఇచ్చింది. ప్రైవేటు సంస్థలు తమ వద్ద పనిచేస్తున్న సౌదీ ఉద్యోగుల జీతాలను తప్పనిసరిగా పెంచాలని ఈ నిబంధన సూచించడం లేదని తెలిపింది. నితాఖత్‌ సౌదీకరణ నిబంధనల ప్రకారం ఒక సంస్థలో పనిచేస్తున్న సౌదీ ఉద్యోగిని పూర్తి స్థాయిలో లెక్కించేందుకు వర్తించే కనీస వేతన పరిమితిని మాత్రమే ఈ నిర్ణయం మారుస్తుంది. అంటే, నిర్ణయించిన పరిమితికి అనుగుణంగా వేతనం ఉన్న ఉద్యోగులనే సౌదీకరణ లెక్కల్లో పూర్తిస్థాయిలో పరిగణిస్తారు.

సంస్థలకు సన్నద్ధతకు అవకాశం

కొత్త నిబంధనల అమలుకు ముందు ప్రైవేటు రంగ సంస్థలకు అవసరమైన మార్పులు చేసుకునేందుకు తగిన సమయం కల్పించే ఉద్దేశంతో ప్రభుత్వం ఈ నిర్ణయాన్ని రెండు దశల్లో అమలు చేయనుంది. ఈ మార్పులు సౌదీకరణ నిబంధనల ప్రకారం సంస్థల ఉద్యోగుల లెక్కింపుపై ప్రభావం చూపనున్నాయి. అందువల్ల ప్రైవేటు సంస్థలు తమ సౌదీ ఉద్యోగుల వేతనాలు, సౌదీకరణ నిబంధనలకు సంబంధించిన అర్హతలను ముందుగానే సమీక్షించుకోవాల్సి ఉంటుంది.