అంతర్జాతీయ పరిస్థితులకు తోడు స్థానిక బులియన్‌ మార్కెట్లోనూ మదుపర్లు అమ్మకాలు కొనసాగించడంతో బంగారం, వెండి ధరలు తగ్గుముఖం పట్టాయి. ఏడాది తర్వాత అమెరికాలో ఫెడరల్‌ బ్యాంకు వడ్డీ రేట్లు పెంచడమూ ఇందుకు దోహదపడింది.
కొనుగోళ్ల మద్దతు లేకపోవడంతో కిలో వెండి ధర రూ.1,410 తగ్గి రూ.41,000 కిందకి దిగొచ్చింది. 99.5% స్వచ్ఛత గల ప్రామాణిక బంగారం 10 గ్రాముల ధర బుధవారం ముగింపు రూ.27,900 నుంచి రూ.550 తగ్గి రూ.27,350కు చేరుకొంది. మరోవైపు 99.9% స్వచ్ఛమైన బంగారం ధర రూ.28,050 నుంచి 27,500కు చేరుకొంది. ఫెడ్‌ వడ్డీ రేట్లు పెంచడంతో పసిడి ఫిబ్రవరిలో నమోదైన కనిష్ఠ ధరకు దిగి రాగా డాలర్‌ 14 ఏళ్ల గరిష్ఠానికి చేరుకొంది.