హైదరాబాద్‌లో రీజినల్‌ స్పోర్ట్స్‌ సెంటర్‌ ఏర్పాటు చేయనున్నట్లు కేంద్ర యువజన సర్వీసులు, క్రీడల శాఖ మంత్రి విజయ్‌ గోయల్‌ ప్రకటించారు. తెలంగాణలో క్రీడల అభివృద్ధికి కృషి చేస్తామని హామీ ఇచ్చారు. స్పోర్ట్స్‌ సెంటర్‌కు స్థలం కేటాయిస్తామని సీఎం కేసీఆర్‌ చేసిన విజ్ఙప్తిపై కేంద్రమంత్రి సానుకూలంగా స్పందించారు. రాష్ట్ర పర్యటనలో భాగంగా హైదరాబాద్‌ వచ్చిన గోయల్‌ సోమవారం సాయంత్రం ప్రగతి భవనలో సీఎం కేసీఆర్‌ను కలుసుకున్నారు. ఇక, వారసత్వ సంపద కలిగిన వరంగల్‌ నగరంలో పర్యటించనున్నట్లు ప్రకటించిన ఆయన.. అరుదైన పర్యాటక కేంద్రంగా పేరుతెచ్చుకున్న లక్నవరం సందర్శిస్తానని తెలిపారు.