కావలసినవి: బియ్యం- 100 గ్రాములు, చేపముక్కలు- 100 గ్రాములు, నెయ్యి - 30 గ్రాములు, ఒక ఉల్లిపాయ ముక్కలుగా తరిగినది, పాలకూర (శుభ్రంగా కడిగి తరిగినది) - రెండు కట్టలు , చిటికెడు పసుపు, కారం- అర టీ స్పూన్‌, గరం మసాల- అర టీ స్పూన్‌ , ఉప్పు రుచికి తగినంత , కొత్తిమీర (అలంకరణకి)- పావుకట్ట, అల్లం వెల్లుల్లి- ఒక టీ స్పూన్‌, పచ్చిమిర్చి- రెండు ముక్కలుగా తరిగినది.
తయారీ విధానం 
చేపముక్కలని కడిగి వాటికి పసుపు, అల్లం వెల్లుల్లి, ఉప్పు పట్టించి పెట్టు కోండి. తరువాత చేపముక్కలని ఒక్కొక్కటిగా నూనెలో వేగించి తీసి పక్కన పెట్టుకోండి. ఒక గిన్నె తీసుకుని నెయ్యి వేడిచేసి ఉల్లిముక్కలని సన్నని సెగమీద వేగించండి. ఉల్లిపాయ రంగుమారకుండా చూసుకోండి. పచ్చిమిరపకాయ ముక్కలు, పొడి మసాల వేశాక కడిగి, నానబెట్టుకున్న బియ్యం వడకట్టి వేసి రెండు నిమిషాలు ఉడికించండి. దానిలో పాలకూరని కూడా వేసి 450 మిల్లీ లీటర్ల నీటిని పోసి ఉడికించండి. చివరగా చేపముక్కలని వేసి కాసేపు వేడిమీద ఉంచండి. తరువాత తరిగిన కొత్తిమీరతో అలంకరించి వేడివేడిగా వడ్డించండి. ఈ కొలతలతో తయారుచేసిన పాలక్‌ ఫిష్‌ కిచిడి ఇద్దరికి సరిపోతుంది.