తెలుగు సినిమా గౌరవ సూచిక, శంకరాభరణం సృష్టికర్త కె. విశ్వనాధ్ ను దాదాసాహెబ్ ఫాల్కే పురస్కారం వరించింది. 2016 సంవత్సరానికి గాను విశ్వనాధ్ ను ఈ అరుదైన అవార్డుకు ఎంపిక చేసినట్లు భారత ప్రభుత్వం ప్రకటించింది. 'స్వీట్ అండ్ సాఫ్ట్' సినిమాలకు, సంగీత, సాంస్కృతిక ప్రధానమైన సినిమాలకు మారుపేరనిపించుకున్న కాశీనాధుని విశ్వనాధ్ కు దాదా సాహెబ్ ఫాల్కే పురస్కారం లభించడం పట్ల దక్షిణాది తెలుగు చిత్రసీమలన్నీ హర్షం వ్యక్తం చేశాయి. శంకరాభరణం, సాగరసంగమం, సప్తపది, శృతిలయలు, స్వయంకృషి, ఆపద్భాంధవుడు లాంటి చిత్రరాజాలు విశ్వనాధ్ సినిమాల జాబితాలో ఎన్నో వున్నాయి. తన సినిమాలతో అనేక మంది స్టార్ హీరోల స్థాయిని మరింత పెంచిన విశ్వనాధ్ తెలుగువాడవ్వడం మన అదృష్టం.