రుస్తుం సినిమాలో నటనకు గాను జాతీయ ఉత్తమ నటుడిగా అవార్డు పొందిన బాలీవుడ్ నటుడు అక్షయ్ కుమార్ కి కోపం వచ్చింది. తనకు ఈ అవార్డు రావడంపై విమర్శలు వెల్లువెత్తడంతో ఆయన ఆగ్రహంతో ఊగిపోయాడు. దంగల్ మూవీలో ఆమిర్ ఖాన్ కన్నా, అలీగఢ్ చిత్రంలో మనోజ్ బాజ్‌పాయ్ కన్నా రుస్తుంలో అక్షయ్ నటన గొప్పగా లేదని కొందరు విమర్శించారు. పైగా అక్షయ్‌కి సన్నిహితుడు, హేరాఫేరి, భాగం భాగ్ వంటి అక్షయ్ సినిమాలకు దర్శకత్వం వహించిన ప్రియదర్శన్ అవార్డుల జ్యూరీ చైర్మన్‌గా ఉండడం వల్లే అతనికి ఈ అవార్డు వచ్చిందని మరికొందరు పెదవి విరిచారు.
దీనిపై ఘాటుగా స్పందించిన అక్షయ్..పాతికేళ్ళుగా ఇలాంటి వ్యాఖ్యలు వింటున్నానని , అవార్డులు ప్రకటించిన ప్రతిసారీ ఈ విధమైన కామెంట్లు వినబడుతున్నాయని అన్నాడు. తనకు 26 ఏళ్ళ తర్వాత ఈ పురస్కారం లభించిందని, ఇది కూడా మీకు నచ్చకపోతే ఈ అవార్డు వెనక్కి తీసుకోండని తీవ్రంగా వ్యాఖ్యానించాడు.