భవిష్యత్తు బంగారు బాట కావాలని

బాల్యమందే బాడుగ బండిలో

బడికి పోయి బాగుగా చదివి

బ్రతుకు బరువు కాకూడదని

భావించి, బలపము నుండి

బి.ఏ వరకు బహుముఖ ప్రజ్ఞతో

బహుమతులెన్నో గెలిచి,

'భలే' అనిపించుకున్నాను!

బాధ్యతాయుతంగా ఉద్యోగం చేసి

భరత మాతకు బహుళ కీర్తి కిరీటం

బహూకరించాలని బంగారు కలలెన్నో కన్నాను!

బాహ్యప్రపంచంలో భజన చేస్తే తప్ప

"భోజనం" దొరకదని భూజనుల వల్ల బోధపడింది!

"బోధి"వృక్షం నా కళ్ళెదురుగా నిలబడింది!

"భోరు"మని ఏడ్వలేక,

బాబోయని అరవ లేక,

భగవంతుని వైపు చూసి,

"భాగ్య రేఖ" నాకెందుకు గీయ లేదని,

భయపడుతూ అడిగాను!

"బాటసారి" ఐయామ్ సారి

బ్రతక నేర్చిన వాళ్ళదే బ్రతుకు

బండ చాకిరికి బంగారానికి

బారెడు దూరం మరి

బాగా ఆలోచించుకో ఒకసారి

"భగవద్గీత" బరువంతా ఇంతే

భరించు బాటసారి అన్నాడు భగవంతుడు!!

                        --- డా|| కోడి రామ, అలైన్, యు ఏ యి.