రాస్‌ అల్ ఖైమా: రమదాన్ పండుగ మరికొన్న రోజులలో జరుపుకోవాల్సిన ఆ కుటుంబంలో అంతులేని విషాదం నెలకొంది. శృతి మించిన వేగంతో అత్యుత్సాహంగా ఓ కారులో ప్రయాణిస్తున్న ఎమిరాటీ  సోదరులు ఇరువురికి పెనుప్రమాదం జరిగింది. ఈ యువకులు కారు వేగంగా నడుపుతుండగా అకస్మాత్తుగా  టైర్ పేలింది. దీంతో కారు అదుపుతప్పింది. రోడ్డుపై వెళ్తున్న ఓ ట్రక్కు లోకి దూసుకెళ్లింది. ఆ భారీ వాహనం, కిందపడిన కారు నుజ్జునుజ్జు అయింది. ఈ ప్రమాదంలో 19 ఏళ్ల యువకుడు అక్కడికక్కడే మరణించాడు . తీవ్రంగా గాయపడిన 21 ఏళ్ల యువకుడిని హుటాహుటిన హాస్పిటల్‌కు తరలించారు. చావుబతుకుల మధ్య పొరాటం చేస్తున్నాడని వైద్యులు తెలిపారు.ఈ ప్రమాదంపై రస్ అల్ ఖైమా పోలీస్ సెంట్రల్ ఆపరేషన్స్ జనరల్ డైరెక్టరేట్ డైరెక్టర్ జనరల్  బ్రిగేడియర్ డాక్టర్ మొహమ్మద్ సయీద్ అల్ హమీడి ఈ రోడ్డు ప్రమాదంపై  విచారం వ్యక్తం చేశారు. వాహనదారులు బయలుదేరే ముందు టైర్లను జాగ్రత్తగా పరిశీలించుకోవాలని, వాహనం భద్రంగా ఉందని నిర్ధారించుకున్న తర్వాతే ప్రయాణం చేయాలని విజ్ఞప్తి చేశారు.