వాయవ్య బంగాళాఖాతంలో అల్పపీడనం ఏర్పడింది. వచ్చే రెండు రోజుల్లో ఇది మరింత బలపడుతుందని వాతావరణశాఖ తెలిపింది. అల్పపీడన ప్రభావంతో రానున్న 24గంటల్లో కోస్తా, తెలంగాణాలో అనేకచోట్ల, రాయలసీమలో అక్కడక్కడా భారీ వర్షాలు కురుస్తాయని వాతావరణశాఖ వెల్లడించింది. అల్పపీడనం బలపడి రుతుపవనాలు చురుగ్గా మారే క్రమంలో కోస్తాలో అక్కడక్కడా భారీ వర్షాలు కురిసే అవకాశముందని, ఈ నెల 19 వరకు వర్షాలు కొనసాగుతాయని తెలిపింది.

అల్పపీడనం బలపడి ఈనెల 18, 19 తేదీలకల్లా వాయుగుండంగా మారుతుందని ఇస్రో కూడా తెలిపింది. ఈ నెల 20 నాటికి ఒడిశాలో తీరం దాటుతుందని పేర్కొంది. శ్రీకాకుళం నుంచి గుంటూరు వరకు వర్షాలు కురుస్తాయని అంచనావేసింది.ఈనెల 18న విశాఖపట్నం, ఉభయ గోదావరి జిల్లాల్లోని పశ్చిమ ప్రాంతం, వాటికి ఆనుకుని వున్న తెలంగాణాలో అతిభారీ వర్షాలు (20 సెంటీమీటర్ల వరకు) కురిసే అవకాశముందని తెలిపింది. వాయుగుండంతీరం దాటి బలహీనపడినా ఛత్తీస్‌గఢ్‌, తెలంగాణాల్లో వర్షాలుకురుస్తాయని, పరీవాహక ప్రాంతాల్లో భారీ వరద లు వచ్చే అవకాశాలు ఉన్నాయని వాతావరణ కేంద్రం తెలిపింది.