మహేష్‌బాబుకి రీమేక్‌ సినిమాల్లో నటించడం అస్సలు నచ్చదు. ఒకరిని ఒక పాత్రలో చూశాక మళ్లీ ఆ పాత్రలో నన్ను నేను వూహించుకోలేను అంటుంటారు. ఆయన బావ సుధీర్‌బాబు మాత్రం అందుకు పూర్తి భిన్నం. రీమేక్‌ సినిమాలే ఆయనకి బాగా అచ్చొచ్చినట్టు అనిపిస్తుంటుంది. సుధీర్‌ కథానాయకుడిగా నటించిన తొలి చిత్రమే ఓ రీమేక్‌గా తెరకెక్కింది. తమిళంలో విజయవంతమైన 'శివ మనసుల శక్తి' ఆధారంగానే సుధీర్‌ 'ఎస్‌.ఎమ్‌.ఎస్‌' రూపొందింది. ఆ మధ్య చేసిన 'కృష్ణమ్మ కలిపింది ఇద్దరినీ' కూడా కన్నడ చిత్రం ఆధారంగా తెరకెక్కింది. తాజాగా ఆయన మరో రీమేక్‌ కథపై మనసు పడ్డట్టు తెలిసింది. తమిళ చిత్రం 'ముందాసుపట్టి' చిత్రం రీమేక్‌లో సుధీర్‌ నటించనున్నట్టు టాలీవుడ్‌లో ప్రచారం సాగుతోంది. కానీ ఈ విషయాన్ని సుధీర్‌ కానీ, ఆయన సన్నిహితులు కానీ ధృవీకరించలేదు. ఇటీవల 'బాఘీ'లో ప్రతినాయకుడిగా నటించిన సుధీర్‌ తదుపరి పుల్లెల గోపీచంద్‌ జీవితంపై హిందీ, తెలుగు భాషల్లో రూపొందనున్న ఓ చిత్రంలో నటించబోతున్నాడు.