యూఏఈ: గల్ఫ్ కోఆపరేషన్ కౌన్సిల్ (GCC) దేశాలు ఇప్పుడు ఈ ప్రాంతంలో పర్యాటకాన్ని పెంపొందించడానికి గేమ్-ఛేంజింగ్ స్కెంజెన్-స్టైల్ వీసాను ప్రారంభించేందుకు ఒక అడుగు దూరంలో ఉన్నాయి. గత వారం మస్కట్‌లో జరిగిన జిసిసి మంత్రుల సమావేశంలో ఒమన్‌లోని హెరిటేజ్,  టూరిజం మంత్రి సలీం బిన్ మహ్మద్ అల్ మహ్రూఖీ ఏకగ్రీవ వీసాను ఆమోదించినట్లు ప్రకటించారు. దీంతో ఒకే వీసాతో యూఏఈ, సౌదీ అరేబియా, బహ్రెయిన్, ఖతార్, ఒమన్, కువైట్‌లను సందర్శించవచ్చు. యూఏఈతో సహా పలు గల్ఫ్ మంత్రులు మరియు ఉన్నతాధికారులు గత కొన్ని నెలలుగా ఏకీకృత వీసాను  ప్రారంభించనున్నట్లు వెల్లడించారు. దీర్ఘకాలంగా ఎదురుచూస్తున్న వీసా ప్రాంతీయ ఆర్థిక వ్యవస్థలను మెరుగుపరచడంతో పాటు మరిన్ని ఉద్యోగ అవకాశాలను సృష్టిస్తుంది.  

GCC దేశాల నివాసితులు వీసా కోసం దరఖాస్తు చేయవచ్చా?
ప్రస్తుతం, GCC దేశాల పౌరులు సభ్య దేశాల మధ్య వీసా రహిత ప్రయాణాన్ని ఆనందిస్తున్నారు. ఈ దేశాల్లో నివసిస్తున్న ప్రవాసులు ఏకీకృత వీసా అమలులోకి వచ్చిన తర్వాత దాని కోసం దరఖాస్తు చేసుకోవచ్చా లేదా అనేది వెంటనే స్పష్టంగా తెలియదు. అయితే, గత నెలలో, UAE ఆర్థిక మంత్రి అబ్దుల్లా బిన్ తౌక్ అల్ మర్రి మాట్లాడుతూ, GCC తమ నివాసితులు సభ్య దేశాల మధ్య స్వేచ్ఛగా ప్రయాణించేలా ఒకే వీసా విధానాన్ని పరిశీలిస్తోందని చెప్పారు.