యూఏఈ: యూఏఈలో వర్చువల్ ప్రైవేట్ నెట్‌వర్క్ (VPN) అప్లికేషన్‌ల డౌన్ లోడ్లు విపరీతంగా పెరుగుతున్నాయి. గత ఐదున్నర సంవత్సరాలలో యూఏఈలో VPN ల డౌన్ లోడ్లు 65.78 శాతం పెరిగిందని సైబర్‌న్యూస్ తెలిపింది. యూఏఈ తర్వాత ఖతార్ 55.43 శాతం, సింగపూర్ 38.23 శాతం, నౌరు 35.49 శాతం, ఒమన్ 31 శాతం, సౌదీ అరేబియా 28.93 శాతం, నెదర్లాండ్స్ 21.77 శాతం, యూకే 19.63 శాతం, కువైట్ 17.88 శాతంమరియు లక్సెంబర్గ్ 17.3 శాతం ఉన్నాయని తెలిపింది.

ఈ ఏడాది మొదటి ఆరు నెలల్లోనే యూఏఈలో 6.11 మిలియన్ VPN యాప్‌లను డౌన్‌లోడ్ చేసుకున్నారు.  2024లో 9.2 మిలియన్లు, 2023లో 7.81 మిలియన్లు మరియు 2022లో 6.54 మిలియన్లు డౌన్‌లోడ్ చేసుకున్నారు.  ప్రస్తుతం ఇదే వేగం కొనసాగితే, ఈ సంవత్సరం డౌన్‌లోడ్‌లు గత సంవత్సరం గణాంకాలను అధిగమిస్తాయని భావిస్తున్నారు.

ఇక VPN వినియోగంలో నిరంతర పెరుగుదల యూఏఈ జనాభా పెరుగుదలతో సమానంగా ఉంది. ఇది వరల్డ్‌మీటర్ డేటా ప్రకారం రికార్డు స్థాయిలో 11.44 మిలియన్లకు చేరుకుంది.  అయితే, యూఏఈలో VPN యాప్‌లను ఉపయోగించడానికి అనుమతి ఉంది. కానీ వాటిని దుర్వినియోగం చేసేవారికి కేసుల తీవ్రతను బట్టి 5లక్షల నుండి 2 మిలియన్ల దిర్హమ్స్ వరకు జరిమానా, జైలు శిక్ష విధిస్తారు.